Кăçал районĕпе пĕрчĕллĕ тата пăрçа йышши культурăсем 17 пин ытла гектар йышăнаççĕ. Çурри ытла ĕнтĕ пухса кĕртнĕ, вырмана вĕçленисем те пур. Районти ял хуçалăх предприятийĕсенчен августăн 23-мĕшĕнче Патăрьелĕнчи акционерсен "Батыревский" хупă пĕрлешỹре тăрăшакансем тыр-пула пĕтĕмпех пуçтарса илнĕ. Тухăç малтанхи кăтартусемпе - 30 центнер ытларах.

Р. Санзяпов фермер хуçалăхĕнче 1500 гектар çĕр, унтан пĕрчĕллĕ тата пăрçа йышши культурăсем 840 гектар йышăнаççĕ. Кунта "Батыревский" пĕрлешỹрен пĕр кун маларах, августăн 22-мĕшĕнче, вырмана вĕçленĕ. Сăмах май, Ыхра Çырмисем республикăра та пĕрремĕш пĕтернĕ.

- Кăçал тухăç та савăнтарать, пĕр гектартан вăтамран 30 центнер ытларах тухрĕ. Яваплă тапхăра хутшăнакансене вĕри апат çитерессине йĕркеленĕ, техникăна патшалăх тĕрĕслевĕ витĕр кăларнă, механизаторсем тивĕçлĕ шалу илеççĕ, çавăн пекех хавхалантаратпăр та. Вырма хамăр хуçалăхра вĕçленнĕ май ытти хуçалăхсене те виçĕ комбайн таран пулăшма параятпăр, - тенĕ Р. Санзяпов фермер район администрацийĕн пуçлăхĕпе Р. Селивановпа хирте тĕл пулнă май.

Рудольф Васильевич "Батыревский" пĕрлешỹре тата фермер хуçалăхĕнче вăй хуракансене чун-чĕререн тăрăшса ĕçленĕшĕн тав тунă.

О. Павлова