Компьютер ĕмĕрĕнчи Интернет тетелĕ такама та паллаштарать çеç мар, наука шайĕнчи пысăк ĕç тума та пулăшать. Тутар Тимешпе Вăтаел çывăхĕнче вырнаçнă "Присурский" заповедника çак кунсенче Чăваш Республикинчен çеç мар, Америкăранах ỹсен-тăрана тĕпчекенсем экскурсие килнĕ. Çак заповедникăн наука сотрудникĕ М. Рахматуллин хаçат редакцине пĕлтернĕ тăрăх, АПШ-ри Миссурири Ботаника сачĕн ĕçченĕсем пирĕн тăрăхра ỹсекен чей курăкĕсемпе, ытти флора тĕнчипе кăсăкланнă, нумай сăн ỹкерттернĕ. Аякри хăнасене сăрт çамкинче вырнаçнă сăвăрсен вырăнĕ те чылай ыйту çуратнă.