Чăваш литературине упраса хăварас тата малалла аталантарас тĕлĕшпе Чăваш Республикинчи Профессиллĕ писательсен союзĕ чылай тăрăшать, тăтăшах тĕл пулусем, литература уявĕсем тата ытти мероприяти йĕркелет. Сентябрĕн 20-мĕшĕнче вăл çамрăк авторсене Наци библиотекине йыхравлать. Унта хальхи вăхăтри паллă çыравçăсемпе çамрăк çыравçăсен тĕлпулу-семинарĕ иртĕ.

Тĕл пулăва паллă çыравçăсем хутшăнаççĕ, вĕсен шутĕнче Анатолий Кибече, Юрий Сементере, Улькка Эльмене тата ыттисене те палăртмалла. Пур çамрăка та литература уявне йыхравлатпăр. Вăл Шупашкар хулинчи Ленин проспектĕнчи 15-мĕш çуртра, Чăваш Республикин Наци библиотекинче иртĕ. Мероприяти 13 сехетре пуçланать.

Ольга ВАСИЛЬЕВА,Чăваш Республикин Профессиллĕ писательсен союзĕн членĕ