РАÇÇЕЙ Патшалăх Думи обществăлла апатлану предприятийĕсенче кальян туртма чарас тĕллевпе кăçалхи июльте саккун йышăннăччĕ. Çак çĕнĕлĕх октябрĕн 30-мĕшĕнче вăя кĕрĕ. Чăваш Республикинче те кальянсемпе усă курма чараççĕ. Коронавирус пандемийĕ вăхăтĕнче çакă кирлĕ те вырăнлă йышăну темелле. Саккуна пăхăнмасăр йĕркене пăсакансен вара самай расхутланма, ĕнсене хыçма та тивет. Пуçа минретекен тĕтĕмпе ашкăннăшăн граждансене 30-40 пин тенкĕ, предприяти хуçисене 60-90 пин тенкĕ таран штраф пама пултараççĕ. Ку тĕлĕшпе Юхмапа Пăла тăрăхĕнчи йĕрке хуралçисемпе ытти профилактика субъекчĕсен представителĕсем ятарлă рейдсем йĕркелеме пикеннĕ те.