Марафон пуçланать

Сăр тата Хусан хỹтĕлев чиккисене тунăранпа кăçалхи октябрĕн 28-мĕшĕнче шăпах 80 çул çитет. Çак пулăма халалланă май ăна паллă тăвассипе çыхăннă мероприятисен марафонĕ Чăваш оперăпа балет театрĕнче пуçланать. Вăл 10 куна тăсăлать. Пысăк пĕлтерĕшлĕ ĕçсен шутĕнче - ĕçри паттăрлăха халалланă палăка çĕклесси. Вăл Куславкка ра- йонĕнче федераци трасси çывăхĕнче пулмалла.

 Аса илтеретпĕр, республика Пуçлăхĕн йышăнăвĕпе килĕшỹллĕн 2021 çул Чăваш Енре Сăрпа Хусан хỹтĕлев чиккисене тăвакансен ĕç паттăрлăхĕн çулталăкĕ ятпа иртĕ.

Миллион тонна кăшт çеç çитеймен

Республикăра кăçал 954,8 пин тонна тĕш тырă пухса кĕртнĕ. 1992 çулхи рекорда (ун чухне кăтарту миллион тоннăран иртнĕ) кăшт çеç çитеймен. Тырпул тухăçĕ пĕлтĕрхинчен 30 процент ытларах. Чи нумай тĕш тырă пухса илекенсем - Елчĕксем тата Канашсемпе Çĕрпỹсем. Фермерсенчен нумайăшĕ хăйсем пухса кĕртнĕ тырă калăпăшĕпе тĕрĕс кăтартусем памаççĕ-мĕн. Хăш-пĕр районта хресчен хуçалăхĕсем кăтартусене пачах та пĕлтермеççĕ. Вĕсен "курăнман" çав цифрисене хушнă пулсан, тен, миллион тонна та пулатчĕ пуль. Выльăх апачĕ хатĕрлессипе те ăнăçлă ĕçленĕ кăçал. Кашни условнăй выльăх пуçне 25 центнер апат кирлĕ пулсан чăннипе вара 30 центнер патнеллех хатĕрленĕ.

Çĕнĕ передатчиксем ĕçлеме тытăннă

 Чăваш Ен Наци телерадиокомпанийĕ телевиденипе пĕрлех икĕ радио тытса тăрать: Чăваш ен Наци радиовĕ тата "Тăван радио". Вĕсене итлесе киленекенсен йышĕ октябрĕн 20-мĕшĕнче тата та хутшăннă. Елчĕк, Тăвай тата Муркаш районĕсенче хумсене валеçекен передатчиксем ĕçлесе кайнă.

Куçса çỹрекен маммограф

Республикăри клиника онкологи диспансерĕн куçса çỹрекен маммографĕ Хĕрлĕ Чутай районĕнче ĕçлет. Коронавирус инфекцийĕ сарăлнине пула чылайăшĕ çак тĕрĕслеве вăхăтра тухайман, çавăнпа халĕ кун пек май тупăнни хĕрарăмсемшĕн питĕ пĕлтерĕшлĕ.

Васкавлă медпулăшу машинин палăкĕ пулĕ

Автомобилист кунĕ умĕн Çĕрпỹ хулинче васкавлă медпулăшу подстанцийĕнче палăк уçма палăртнă. Вăл "03"-ĕн пĕрремĕш автомобилĕ пулĕ. Палăртмалла, юлашки тăватă çулта васкавлă медпулăшу машинисен паркĕ çĕнелсех пырать: çĕнĕ 189 машина туяннă. Кăçал тепĕр 30 машина илсе килнĕ.

Республикăри чи лайăх участковăя палăртнă

 Пĕтĕм Раççейри "Народный участковый" конкурс кăçалхипе вуннăмĕш хут иртет. Унта хутшăнма тивĕçлисене малтан регионсенче палăртаççĕ. Пирĕн республикăран унăн регионти тапхăрне полицин участокри 13 уполномоченнăйĕ хутшăннă. Вĕсемшĕн онлайн мелпе октябрĕн 7-мĕшĕнчен пуçласа октябрĕн 16-мĕшĕччен сасăланă. Онлайн сасăлавра пуринчен ытла сасă пухса ЧР ШĔМĕн Шупашкарти управленийĕн 3-мĕш пайĕнчи полици уполномоченнăйĕ Айрат Умеров çĕнтернĕ.