«Фермерсен шкулĕ» уçăлĕ

Чăваш Енре «Фермерсен шкулĕ» ĕçлеме тытăнĕ. Кун пирки ЧР Пуçлăхĕ Олег Николаев «Россельхозбанкăн» правлени председателĕпе Борис Листовойпа тĕл пулсан калаçнă. Икĕ ен Чăваш патшалăх аграри университетĕнче «Фермерсен шкулне» уçма калаçса татăлнă. Ку – банкăн вĕренÿ проекчĕ. Мĕн тĕллевпе ĕçлĕ-ха вăл? Çамрăксене, усламçăсене ял хуçалăхĕнче рентабельлĕ услам тытса пыма вĕрентĕ.

Комсомолпа чи çутă асаилÿсем çыхăннă

Чăваш Республикин Пуçлăхĕ Олег Николаев Правительство çуртĕнче комсомол ĕçĕн хастарĕсемпе тĕл пулнă. Çав çынсем ĕнер харсăр комсомолецсем пулнă пулсан, паян вара вĕсем пурнăçра пысăк çитĕнÿ тума пултарнă çынсем, халăх хуçалăхĕн ăста кадрĕсем. «Совет саманинче комсомол пысăк пĕлтерĕшлĕ вăй шутланнă. Унăн ретĕнчен халăх хуçалăхĕ валли кадрсем пиçсе тухнă. Комсомолецсем çĕршыври чи пысăк стройкăсене хутшăннă. Чăваш комсомолĕсен вăйĕпе, сăмахран, Шупашкар ГЭСне хута янă, Трактор заводне çĕкленĕ. Эсир — комсомолăн çутă тĕслĕхĕсем. Сирĕн паха опытпа хальхи вăхăтра çамрăк ăрăва паллаштарма май килни питех те савăнтарать. Вăхăт хăвăрт шăвать, чылай япала улшăнать. Анчах та эсир яланах çамрăк. Комсомол ватăлмасть тесе ахальтен каламан ĕнтĕ», — тенĕ Олег Николаев комсомол ветеранĕсене тĕл пулма май килнĕшĕн тав туса тата Чăваш комсомолĕ йĕркеленнĕренпе 100 çул çитнĕ ятпа саламласа.

«Пысăк этнографи диктанчĕ»

Халăх пĕрлĕхĕн кунне халалласа ноябрĕн 3-8-мĕшĕсенче Раççейĕн мĕн пур субъектĕнче онлайн мелĕпе «Пысăк этнографи диктанчĕ» иртет. Унта вырăс чĕлхине пĕлекен ют çĕршыв çыннисем те хутшăнма пултараççĕ. Пиллĕкмĕш çул иртекен акцие кирек хăш ÿсĕмри çыннăн та хутшăнма ирĕк пур. 30 ыйтуран тăракан диктанта 45 минут хушшинче çырмалла. 20 ыйтăвĕ пурин те пĕр евĕр, 10-не кашни субъект валли уйрăмшар хатĕрлĕç. Ыйтусене www.miretno.ru сайтра вырнаçтарнă, хуравĕсемпе те çак сайтрах ноябрĕн 16-мĕшĕнче паллашма пулĕ. Уйрăм кăтартусене вара Раççей Конституци кунĕнче маларах асăннă сайта лартĕç.

20 пин тонна пахча çимĕç туса илĕç

Çĕнĕ Шупашкарта инвестици проекчĕн иккĕмĕш тапхăрне уçнă. Сăмах теплица комплексĕ пирки пырать. Кун пирки ЧР Ял хуçалăх министерстви пĕлтерет. Малашне теплицăра çулталăкне 20 пин тонна пахча çимĕç туса илĕç. Çĕнĕ теплица уçсан 150 ĕç вырăнĕ хутшăннă, халĕ унта 400 çын тăрăшать. Теплица 22 гектар йышăнать. Унта экологи тĕлĕшĕнчен таса помидорпа хăяр туса илеççĕ. Кашни тăваткал метртан 70 килограмм ытла помидор, 120 килограмм ытла хăяр туса илесшĕӗн. Палăртмалла: пĕрремĕш теплица пĕлтĕр октябрь уйăхӗнче уçăлнă.

Ентешĕмĕршĕн сасăлар

Пирĕн ентеш, тĕнче чемпионки Анжелика Сидорова Раççей спорт министерствин наци премине тивĕçме пултарĕ. Маттур спорстменка çак премин «Раççей мăнаçлăхĕ» номинацире палăрнă. Наци спорт премине çулсерен 11 номинацире 18 категорипе параççĕ. Ҫĕнтерӳçĕсене тӳресемпе пĕрлех ахаль çынсем те палăртаççĕ. Хăйсене кăмăллакан спортсменшăн кашниех Раççей спорт премийĕн сайтне кĕрсе сасăлама пултарать.