Сăр тата Хусан хÿтĕлев чиккине тума хутшăннă çынсен пархатарлă ĕçĕ Чăваш Ен кăна мар, Раççей историне пысăк сас паллисемпе çырăнса юлмашкăн тивĕç. ЧР Пуçлăхĕн Олег Николаевăн йышăнăвĕпе 2021 çула паттăрла çак пулăма халаллаççĕ те. Хĕрарăмсен, ватăсен, ачасен сăмахпа калайми пысăк ĕçне сума сăвакан çулталăкра тĕрлĕ ĕç туса ирттерĕç-ха.

Уяв мероприятийĕн вăчăри анлă та пуян пуласса шантарать. Октябрĕн 28-мĕшĕнче Чăваш патшалăх оперăпа балет театрĕнче çулталăка официаллă майпа уçнă. «Чĕмсĕр чикĕсен строителĕсене…» ас тăвăм акцийĕ мероприятисен ярăмне пуçларĕ.

_ 79 çул каялла Чăваш Республикинче паллă та яваплă тапхăр пуçланнă. Пирĕн асаттесем, асаннесем, ун чухне ача-пăча пулнăскерсем, йывăр ĕç пуçласа ăна кĕске вăхăтрах туса пĕтерме пултарнă. 5 млн кубла метр çĕр чавнă вĕсем. Енчен те автотранспорт колоннине куç умне кăларас пулсан вăл Чăваш Енрен тытăнса Новосибирска çитиех тăсăлĕччĕ. Пирĕн тĕллев - ас тăвăма чĕртсе тăратасси. Шăпах унра - вăй - историе хисепленин пĕлтерĕшне палăртнă Олег Алексеевич.

Ленинграда хÿтĕлеме чăваш салтакĕсем те хастар хутшăннă. Чылайăшĕ таврăнайман. Тăванĕсем пуç хунă вырăнсене кашниех çитсе кураймасть. Çакна шута илсех Ленинград облаçĕнчен çитнĕ делегаци «Невский пятачок» лаптăкран çĕр илсе килнĕ. Капсула Чăваш наци музейĕнче вырăн тупĕ. Ленинград облаçĕнчи Çар мухтавĕн музейĕнче вара малашне Чăваш Енри хÿтĕлев чиккисенчи тăпра та упранĕ.

Пĕлтерĕшлĕ пулăмсен йышĕнче — Куславкка районĕнче хÿтĕлев чиккин паттăрĕсен ячĕпе палăк лартасси. Ун валли хăйсен çĕр лаптăкне пама кăмăл тунисен патриотизм туйăмне сума суса в.сене Чăваш автономи облаçĕ 100 çул тултарнă ятпа кăларнă юбилей медалĕсемпе чысланă.

Уява театрпа кино артисчĕсем-_ Ленинград хулинче çуралса ÿснĕ Анна Миклош тата Çĕнĕ Шупашкарта çуралнă Анатолий Гущин- ертсе пынă. Севастопольтен килнĕ хăнасем те  - Хĕрлĕ ялавлă Хура тинĕс флочĕн юрăпа ташă ансамблĕ - куракан кăмăлне тупнă.Çавăн  пекех  Патăрьел  районĕнчи культура учрежденийĕсен ĕçченĕсем те акцие хастар хутшăнчĕç, 79 çул каяллахи вăхăта сăнлакан хăш-пĕр саманта кăтартса пама пултарчĕç .

А. Иванов