Майăн 14-19-мĕшĕсенче Хусанта "Раççей - Ислам тĕнчи: KazanForum" Пĕтĕм тĕнчери экономика форумĕ иртнĕ.

Унăн ĕçне Чăваш Республикин экономика аталанăвĕн министерствин делегацийĕн йышĕнче Патăрьел муниципалитет округĕн пуçлăхĕ Рудольф Селиванов та хутшăннă.

Пысăк пĕлтерĕшлĕ форума 85 çĕршывран 20 пине яхăн çын килнĕ. Мероприятинче 120 ытла ĕçлĕ сесси ирттернĕ.

Патăрьел муниципалитет округĕпе Узбекистанри тир-сăран предприятийĕн Ассоциацийĕ ĕçлĕ çыхăнăва аталантарас тĕллевпе килĕшỹ çырнă. Çывăх вăхăтра хута каякан "Батыревский" индустри паркĕнче тир тирпейлекен цех йĕркелесшĕн.

Çавăн пекех Рудольф Селиванов форумра "Хусанти çу комбиначĕ" акционерсен обществин директорсен канашĕн председателĕпе Дмитрий Самеренкинпа аграри сферине аталантарас пирки те сăмах хускатнă. Сăмах май каласан, çак пĕрлешỹ рапсран, хĕвелçаврăнăшран çу туса кăларас тĕлĕшпе кăтартуллă ĕçлет.

 (Хамăр корр.).