Республикăра, çавăн пекех округра та хальхи вăхăтра "Трактор" операци пырать. Çавна май Шалти ĕçсен министерствин муниципалитетсем хушшинчи "Батыревский" уйрăмĕн çул-йĕр инспекторĕсемпе пĕрле рейд ирттертĕмĕр. Техника юсавлине, патшалăх тĕрĕслевĕ витĕр тухнине, регистраци тунине, çул-йĕр правилине пăхăннине, механизаторсен прависем тата вĕсен тракторпа çỹреме ирĕк паракан категорисем пуррине тата ыттине те пăхрăмăр. Рейд вăхăтĕнче 10 техникăна тĕрĕслерĕмĕр. Йĕркене пăсакансене административлă штраф çырма тиврĕ.

 "Хурçă ута" патшалăх тĕрĕслевĕ витĕр кăларман пулсан çула тухма та, хирте ĕçлеме те юрамасть! Юсавсăр техникăн рулĕ умне лармалла мар, инкек юнашарах çỹренине асра тытмалла. Çавăн пекех механизаторсен права тата ытти документсем яланах çумра пулмалла.

 "Трактор" операци малалла тăсăлнă май рейдсем çывăх кунсенче тата пулаççĕ.

Сергей САФЬЯНОВ, Патшалăх техника надзорĕн Патăрьел округĕнчи инспекцийĕн начальникĕ - аслă инспектор