Чăваш патшалăх оперăпа балет театрĕнче аграрисем ял хуçалăх тата тирпейлекен промышленноçра ĕçлекенсен професси уявне паллă тунă. Пĕтĕмлетỹ мероприятине Патăрьел муниципалитет округĕн пуçлăхĕ Рудольф Селиванов ертсе пыракан делегаци те хутшăннă.

Аграрисен мăнаçланмалăх сăлтавĕсем те пур. Выльăх-чĕрлĕхрен продукци илесси хушăнсах пырать, тыр-пул тухăçĕ те аван. Пĕтĕмĕшле (республикипе) 800 пин тонна патнеллех тырă пухса кĕртнĕ. Çак кăтартусенче - ял ĕçченĕсен, ял хуçалăх тата тирпейлекен предприятисен ырми-канми ĕçĕ, производствăна ỹстерсе пырассишĕн тăрăшни.

Пине яхăн çын кĕрекен залра пуçтарăннă аграрисене Чăваш Республикин Пуçлăхĕ Олег Николаев тата вице-премьер - ял хуçалăх министрĕ Сергей Артамонов саламланă. Çавăн пекех чи тăрăшуллисене тĕрлĕ шайри наградăпа чысланă. Туçари Валерий Кузнецов хресчен-фермер хуçалăхĕ пĕрремĕш степенльлĕ диплома тивĕçнĕ.

Александр ИЛЬИН