ПАТĂРЬЕЛĔНЧИ пушар надзорĕнчен пĕлтернĕ тăрăх, паянхи кун тĕлне округ территорийĕнче 52 пушара шута илнĕ. Иртнĕ çулхи çак вăхăтра вут-çулăм алхасса çынсене шар кăтартнă 45 тĕслĕх пулнă.

Вырсарникун, ноябрĕн 10-мĕшĕнче, каçхине 17 сехетре Туçа территори пайне кĕрекен Кивĕ Ахпỹртри Митрофановсен мунчинче сасартăк вут-çулăм алхасма пикеннĕ. Пушарниксем çирĕплетнĕ тăрăх унăн сăлтавĕ - юсавсăр кăмака. Инкеке сарăлма паман. Туçара халăх вăйĕпе тытса тăракан пушар хуралĕн машини оперативлă çитнĕ, вут-çулăма хăвăрт сỹнтернĕ. Сăмах май каласан, нумай пулмасть çеç вĕсем пĕрлехи вăйпа çак автомобилĕн двигательне çĕнетрĕç.