Тутар Сăкăт ял библиотекинче Чăваш Енри халăхсен туслăхĕн çулталăкне халалласа «Вăрăм та хастар пурнăç» клуб членĕсем республикăра пурăнакансен тĕрлĕ енлĕ йăли-йĕркипе паллашнă.

Библиотека заведующийĕмалтанах Чăваш Енре пурăнакан чăвашсен, тутарсен, ирçесен тата ыттисен пурнăçĕ çинче чарăнса тăнă. Унтан ĕмĕртен-ĕмĕре пыракан ял йăли-йĕркине, тĕн уявĕсене аса илнĕ. Халăх тăвакан алă ĕçне палăртнă. Тутлă çимĕç пĕçерме те ăста вĕсем. Презентаципе никах, калым, Ураза-байрам, Курбан-байрам, ытти уявсене кăтартнă.

Мероприяти вăхăтĕнчех кÿршĕллĕ пурăнакан чăвашсен йăли-йĕркине те пăхнă. Акатуй-Сабантуй округра пурăнакансемшĕн пĕлтерĕшлĕ. Мăнкуна, çимĕке, нимене тата ыттине те пăхăнса пурăнаççĕ. Чăвашсен çĕвви-тĕрри, тумĕ те интереслĕ.

Вырăссем çăварние, ирçесем хăйсен уявĕсене мала хураççĕ, паллах.

Мероприятие хутшăнакансем кашни нацин ташшипе те кăсăкланчĕç.

Альбина ИВАНОВА