ТИЛĔСЕНЕ унччен вăрманта çеç курнă пулсан халĕ ялтах çÿреççĕ, пахчасенче хăйсене чăн-чăн хуçа пекех тытаççĕ. Çынран та, йытăран та хăрамаççĕ. Выçса çитсен апат та таçта кайса шырамалла мар: çынсен кайăк-кĕшĕк картиш тулли.

Ялсенче çак чее куçлă чĕрчунтан тарăхмаллипех тарăхса çитнĕ. Мал ĕмĕтпе çынсем хур-кăвакалпа чăх-чĕп туянаççĕ, ирхине тухнă çĕре вĕсен шучĕ сайралнă е пачах та çук. Кун пек тĕслĕхсем Çăкăт, Çĕньял, Ишлĕ, Туçа территории пайĕсенчи ялсенче час-часах тĕл пулнине пăшăрханса пĕлтерчĕç хаçат вулаканĕсем.

Çынсене нуша кăтартакан тилĕсем уртаракан чир сарма та пултараççĕ, çакă шиклентерет, ыйтăва тивĕçлĕ шайра татса пама хистет.