Ачасене вĕренме, аталанма условисем çителĕклĕ пулччăр тесе пĕлÿ çурчĕсенче сахал мар тăрăшаççĕ, черетпе классене те çĕнетсе пыраççĕ. Ырă ĕçе ашшĕ-амăшĕ те хутшăнать.

Патăрьелĕнчи пĕрремĕш вăтам шкулти 7 б класра вĕренекенсем урăх кабинета куçнине пĕлсен çывăх çыннисем ачисемшĕн тăрăшса класа хăйсен вăйĕпе çĕнетме шут тытнă. Кĕске вăхăтрах кивĕ светильниксем вырăнне лайăхрах çутатакан лампăсем лартнă, урайне, маччана сăрланă. Кивелнĕ сĕтел-пукана, шкафсене иккĕмĕш «пурнăç» парнеленĕ. Çавăн пекех стендсене те вырнаçтарса çакнă.

Сентябрĕн 1-мĕшĕнче вĕренекенсем савăк кăмăлпа парта хушшине ларса анлă пĕлÿ тĕнчин алăкне уçасса шанас килет.