Птăрьелĕнчи «Паттăр» физкультурăпа спорт комплексĕнчи ачасемпе çамрăксен спорт шкулĕ «Раççейри ачасене хушма пĕлỹ паракан чи лайăх 100 организаци» конкурсра «Ачасемпе çамрăксен чи лайăх спорт шкулĕ» номинацинче лауреат ятне çĕнсе илни, А. Краснов ертỹçĕ вара «Çулталăк директорĕ - 2018» паллăна тивĕçни пирки «Авангардра» пĕлтернĕччĕ ĕнтĕ. Конкурс пĕтĕмлетĕвĕ Санкт-Петербург хулинче пулчĕ. Инçе тата асра юлакан çул çỹрев пирки вулакансене тĕплĕнрех паллаштарас тĕллевпе Алексей Краснова хаçат тĕпелне чĕнтĕмĕр.

- Раççейри çиччĕмĕш «Шкул пуласлăхĕ» форум 4 куна пычĕ. Унта ку чухнехи вĕрентĕвĕн аталану малашлăхĕпе перспективисене палăртрĕç. Тĕп доклад актуаллă ыйтусене çутатрĕ. Секци ларăвĕсенче, çавра сĕтел хушшинчи калаçусенче вырăнсенчи ĕç опычĕсемпе паллашма май пулчĕ.

- Малтанхи кунĕнче Санкт-Петербургри паллă вырăнсене экскурсисене илсе çỹрерĕç. Иккĕмĕшĕнче конференци ĕçлерĕ. Паллă çынсемпе тĕл пулма тỹр килчĕ. Чыслава та çак кунах йĕркелерĕç.

Виççĕмĕш кунĕ те асра юлмалла иртрĕ.

- Паллах, çакнашкал чыса тивĕçни савăнтарать. Анчах çитĕнỹ çанă тавăрса ĕçлемесĕр пулмасть-çке-ха...

- Тĕрĕсех. Юхмапа Пăла тăрăхĕ Чăваш Республикинчи чи вăйлă аталаннă спорт районĕсенчен пĕри шутланать. Ачасемпе çамрăксене хушма пĕлỹ паракан спорт шкулĕ çине тăрса ĕçлет. Паянхи кун учрежденире спортăн 17 енĕпе (ирĕклĕ майпа кĕрешесси, велоспорт, çăмăл атлетика, йывăр атлетика, армрестлинг, кире пуканĕ йăтма хăнăхасси, шывра ишесси, волейбол, футбол, хоккей, «Корэш» кĕрешỹ, триатлон...) 906 вĕренекен кирлĕ хăнăху илет. Вĕсемпе штатри 19 тренер-преподаватель ĕçлет. Тăххăрĕшĕ çак ĕçе ытти тĕп тивĕçĕсемпе пĕрле пурнăçласа пыраççĕ.

- Тренерсен ăсталăхĕ пирки мĕн каланă пулăттăр?

- Ĕçĕсене тивĕçлĕ пурнăçланăран пĕрне «Раççей тава тивĕçлĕ тренерĕ», тепĕрне «Раççей Федерацийĕн физкультурăпа спортăн тава тивĕçлĕ ĕçченĕ», виççĕшне «Раççей Федерацийĕн пĕтĕмĕшле вĕрентĕвĕн хисеплĕ ĕçченĕ», иккĕшне «Чăваш Республикин тава тивĕçлĕ тренерĕ», иккĕшне СССР спорт мастерĕ, улттăшне Раççей спорт мастерĕ ятсене панă. Иккĕшĕ аслă, вуннăшĕ пĕрремĕш квалификаци категориллĕ тренер-преподавательсем.

- Ялсенчи шкулсенче те филиалсем пур-и?

- Кашнийĕшĕнчех. Ачасем спорта юратса ỹсчĕр тесе йĕркеленĕ вĕсене. Кашни шкултах спорт залсем, спорт площадкисем пур. Спорт хатĕрĕсем те çителĕклĕ. «Паттăр» тата «Олимп» физкультура комплексĕсем пур.

- Спорт мероприятийĕсем те йышлă ирттеретĕр ĕнтĕ...

- Вăтам тата пĕтĕмĕшле тĕп пĕлỹ паракан шкулсем хушшинче 22 енпе спартакиада иртет. «Зарница» тата «Орленок» слечĕсем пулаççĕ. Çулленех район территорийĕнче икĕ хутчен тĕнче чемпионки пулнă, тĕнче кубокне тивĕçнĕ, çуллахи Пекинри маунтинбайк енĕпе олимп вăййисен пăхăр медальне тивĕçнĕ, Раççей спорчĕн тава тивĕçлĕ мастерĕ Ирина Калентьевăн, тĕнче чемпионĕ, кĕрешес енĕпе тĕнче кубокне çĕнсе илнĕ Раççей спорчĕн тава тивĕçлĕ мастерĕн Минсеит Тазетдиновăн парнисене çĕнсе илессишĕн Раççей шайĕнчи турнирсем, 800 метра чупас енĕпе темиçе хутчен Совет Союзĕн чемпионкин Фаина Краснован, тĕнче рекордсменкин, утас енĕпе тĕнче класлă спорт мастерĕн Александра Деверинская ячĕпе те ăмăртусем пулаççĕ. Ирĕклĕ майпа кĕрешес енĕпе, волейболла, футболла, хоккейла, шашка-шахматла выляса, велоспортпа 20 ытла ăмăрту иртет. Первомайскинче Ю. Ендеев воин-интернационалист, Патăрьелĕнче Н. Прохорова ячĕсемпе волейбол, Хирти Пикшикре ирĕклĕ майпа кĕрешессипе Паттăрлăх орденĕн кавалерĕн Ф. Камалетдиновăн ăмăртăвĕсем кăтартуллă иртеççĕ. Çулталăк пуçланнăранпа ачасемпе çамрăксен спорт шкулĕн спортсменĕсем республикăри 35 чемпионатпа ăмăртăва, федерацин Атăлçи округĕнчи 15 тупăшăва, Раççей шайĕнчи 12 турнира хутшăннă.

-Вĕсенче мала тухнисене те палăртса хăварар-ха.

- В. Соколов, Л. Селиванов, С. Осипов, О. Кузьмина, А. Чанга велоспортпа, А. Чашкин, М. Молочников, Н. Шайдуков, К. Вахитов кĕрешсе, К. Петухова çăмăл атлетикăра, А. Ишмуратовпа И. Карама «Корэш» ăмăртура палăрмаллах çитĕнỹсем турĕç. М. Киргизов 5000 метра чупса Раççей шайĕнче пăхăр медале тивĕçрĕ. Н. Никитина утас тĕлĕшпе Раççей спорт мастерĕн нормативне тултарчĕ. Ю. Никитин триатлонпа çитĕнỹ турĕ. Г. Камалетдиновăпа И. Тумаков армрестлингпа Раççей тата федерацин Атăлçи округĕн призерĕсем. 2018 çулта спорт енĕпе пирĕн 10 воспитанника Раççей пĕрлештернĕ команди йышне кĕртнĕ. Юхма Енĕн 46 каччипе хĕрĕ Чăваш Республикин командисен йышĕнче. 2013-2017 çулсенче районти ачасемпе çамрăксен спорт шкулĕ республикăри çакнашкал учрежденисем хушшинче малти вырăнсенче пулнишĕн те мăнаçланмалăх пур.

- Çитĕнỹсем савăнтараççĕ. Спортпа туслă çын пурнăçра малтисен ретĕнче. Çитĕнекен ăру çакнашкал ỹсни паха. Малашне те ăнăçусем пулччăр сирĕн, Алексей Егорович.

А. АСТРАХАНЦЕВА калаçнă.