ЫР КĂМĂЛЛĂХПА, спонсорла пулăшупа çыхăннă ĕçсене сарас, çавăн пекех районăн социаллă пурнăçĕпе экономика, культура аталанăвĕшĕн пысăк тỹпе хывнă уйрăм граждансене, предпринимательсене, организацисемпе предприятисене хавхалантарас тĕллевпе район администрацийĕн хушăвĕпе килĕшỹллĕн "Патăрьел районĕн çулталăк меценачĕ" конкурс ирттересси ырă йăлана кĕчĕ. Çакнашкал конкурса районта виççĕмĕш хут пĕтĕмлетрĕç. Хальхинче "Çулталăк меценачĕ - 2018" хисеплĕ ята Гузелия Мухарямовна Сафина тивĕçрĕ.

Г. Сафина Кзыл Чишмара çуралса ỹснĕ, Алманчăри вăтам шкултан вĕренсе тухнă хыççăн Хусанти финанспа экономика институтĕнче пĕлĕвне малалла тăснă. Раççей Федерацийĕн тата Тутарстанăн тава тивĕçлĕ экономисчĕ 1995 çултанпа "ТАИФ" компанин генеральнăй директорĕн çумĕ пулса ĕçлет. Маларах çак хисеплĕ ята "РЕМИСС" тата "Лента" обществăсен ертỹçисем Минхайдар Юсуповпа Роза Иванова тивĕçнĕ.