Чăваш Республикин тĕп хулинче Раççейри çăмăл атлетикăн 100-мĕш чемпионачĕ иртет. Мероприяти июлĕн 24-27-мĕшĕсенче Шупашкарти "Олимпийский" стадионта (Чапаев урамĕ, 17-мĕш çурт) пулать.

Юбилейлă чемпионата йĕркелекенсем - РФ Спорт министерстви, ЧР спорт тата физкультура министерстви, Шупашкар хула администрацийĕ, çăмăл атлетикăн Пĕтĕм Раççейри Федерацийĕ.

Ăмăртăва 600 ытла спортсмен - Олимп вăййисен, тĕнче, Европа, Раççей чемпионачĕсен çĕнтерỹçисемпе призерĕсем - хутшăнаççĕ. Калăпăр, çỹллĕшне сикекенсен лапамĕнче Анна Чичерова Олимп чемпионкипе Мария Ласицкене (Кучина) тĕнче чемпионки тупăшĕç, тăршшĕне сикекенсем хушшинче Дарья Клишинăпа Елена Соколова вăй виçĕç. 400 метрлă дистанцире Раççей рекордсменкипе Полина Миллерпа тĕнче чемпионачĕн призерĕ Антонина Кривошапка ăмăртĕç.

Арçынсенчен çỹллĕшне сикекенсем хушшинче Чăваш Енре иртекен ăмăртăва 2018 çулхи Европа чемпионачĕн пăхăр призерĕ Илья Иванюк тата тĕнче сезонĕн иккĕмĕш результатне кăтартнă Михаил Акименко килме кăмăл тунă. Ăмăртура тата ытти паллă спортсменсем те старта тăраççĕ.

Стадион çумĕнчи лаптăкра ытти мероприятисем те иртеççĕ. Чăваш Республикин чи пултаруллă артисчĕсен юррисене итлеме, тĕрлĕ конкурса, çавăн пекех лотерея вылявне хутшăнма та май пулать.

Билетсене "Пăр Керменĕнче" тата "Олимпийский" стадионта сутаççĕ, хакĕ - 50-100 тенкĕ.