ÇУРЛА ял хуçалăх ĕçченĕсемшĕн хĕрсе ĕçлемелли вăхăт, тыр-пул пуçтарса илмелли яваплă уйăх темелле. Анчах та вăл кашни çул эпир кĕтнĕ евĕр килмест. Кăçалхи йĕпе-сапапа пуян. Илен хыççăн та çанталăк уяртни туйăнмасть-ха. Ахальтен мар ĕнтĕ çак праçник хыççăн шыва та пĕр катăк пăр чăмать, теççĕ. Халĕ, акă, кашни кунах çумăр пĕрĕхет, ял çыннине çитĕнтернĕ пахча-çимĕçе, улма-çырлана пуçтарса илме чăрмантарать. Вăхăтне вăрласа илме те май çук темелле. Çанталăка сăнакансем çывăх кунсенче те хĕвел хĕртессе шантармаççĕ-ха.