Августăн 28-мĕшĕнчен пуçласа сентябрĕн 1-мĕшĕччен Канадăра маунтинбайк енĕпе тĕнче чемпионачĕ иртет. Ăмăртура Олимп лицензийĕсене выляттараççĕ. Унта Чăваш Ен спортсменки, пирĕн ентеш, Нăрваш Шăхаль хĕрĕ Ирина Калентьева (Ягупова) та хутшăнĕ. Анчах та республикăри МИХ хатĕрĕсем пĕлтернĕ тăрăх пирĕн спортсменкăшăн çак сезон юлашки те пулма пултарать-мĕн. Кун пирки вăл хăйех пĕлтернĕ. "Манăн çурăм хыçĕнче _ пилĕк Олимп вăййисем. Хăçан та пулсан професси карьерине вĕçлемелли самант та çитет, мĕншĕн тесен вăй чакса пырать. Çавăнпа та ку сезон маншăн юлашки пулĕ тесе йышăнтăм", - тенĕ вăл.

Сăртлă-туллă дистанцие велосипедпа парăнтаракан спортсменка 20 çулта чухнех Тĕнче кубокне илме тивĕçнĕ. Халĕ вăл Швейцарире пурăнать, мăшăрĕ (Швейцари çынни) йĕркеленĕ профессионал велокомандăшăн тупăшать.