ÇĔР-ШЫВРИ экономикăри лару-тăру вăйпитти çынна кашнинех пурнăçа сыпăнтармалли мелĕсене шырама хистет. Пытарма кирлĕ мар, паян ялсенчен чылайăшĕ пысăк хуласене кайса укçа-тенкĕ ĕçлесе илме тăрăшать. Вăл шутра Мускав облаçне "мусора" (халăхра çапла калаççĕ) каякансем те сахал мар. Хĕрарăмми те, арçынни те унта çỹрет. Çемье валли укçа-тенкине ĕçлесе килни лайăх-ха. Ырă шухăшпа каякансен ĕмĕчĕ синкерлĕ çаврăнса тухни вара пăшăрхантарать. Çак кунсенче Юхмапа Пăла тăрăхĕнче сарăлнă усал хыпар малашне пурне те шухăшлаттармаллах. Пирĕн районти тĕрлĕ ялти виçĕ арçыннăн виллине çак пысăк хуларан илсе килме тивнĕ. Çакскерсем çỹп-çап сортланă чухне пуçламан кĕленче эрех тупнă-мĕн. Пиллĕкĕн çакна ĕçнĕ. Виççĕшĕ çийĕнчех вилнĕ, иккĕшĕ больницăра.