РАЙОН центрĕнче "Родник" профилактори ĕçлеме пикенни вуншар çул та иртрĕ ĕнтĕ. Патăрьелĕнчи тĕп больницăна пăхăнса тăракан сиплев учрежденине тĕпрен юсанă хыççăн паян вăл хулари пĕр-пĕр санаторинчен те кая мар. Медперсонал та пациентсене яланхиллех ăшшăн та кăмăллăн йышăнать. Тĕрлĕрен сиплев илмелли условисем çителĕклĕ. Акă, çак кунсенче Патăрьелĕнчи Л. Спинова пенсионерка кун пирки хăйĕн шухăшне хаçат редакцинех шăнкăравласа пĕлтерчĕ. Ватă çын ура сурнипе, утайманнипе нушаланать-мĕн. Пĕрремĕш кунхине вăл профилакторие сипленме çын пулăшăвĕсĕр те кĕреймен. Юлашки кунĕнче вара çăмăллăнах утса тухса кайнă. Хĕрарăм район центрĕнче çакăн пек центрсем пулнăшăн чун-чĕререн савăннине пĕлтерчĕ, тĕрлĕрен наци программипе патшалăх çын сывлăхне упрассине пысăк тимлĕх уйăрнăшăн чĕререн тав турĕ.