Капиталпа усă курнă

Республикăра амăшĕн (çемье) капиталне – 100 пин тенкĕ – парасси малалла пырать. Çулталăк пуçланнăранпа унпа 1579 çемье усă курнă. Вĕсенчен 65,7 проценчĕ ăна пурăнмалли условисене лайăхлатма янă, 34,3 проценчĕ – ачисене вĕрентме. Ачаллă çемьесене социаллă пулăшу памалли тытăмра 38 тĕрлĕ çăмăллăх пур. Чăваш Енри çемьесенче виççĕмĕш тата ун хыççăнхи ачасем çуралсан амăшĕн капиталĕ çумне амăшĕн республика капиталне те тÿлеççĕ. 2019 çулта республикăра амăшĕн капиталне тÿлеме 120 миллион тенкĕ уйăрнă.

Каяш çаврăнăшне тишкернĕ

Чăваш Республикин Общество палатинче йăлари хытă каяш (ЙХК) çаврăнăшне çĕнĕлле йĕркеленĕ май пурнăçланă ĕçсемпе çыхăннă ыйтусене сÿтсе явнă. Палата членĕсем полигона каяш турттарассине, çак ĕçе йĕркелеме çирĕплетнĕ графика вырăнсенче еплерех пăхăннине, контейнерсемпе мĕнлерех тивĕçтернине, вĕсене лартма лапамсем тăвассине тĕпченĕ. Çак ĕçсем çинчен патшалăхăн пурăнмалли çурт-йĕр инспекцийĕн ертÿçин çумĕ Александр Юркин, палатăн пурăнмалли çуртсемпе коммуналлă хуçалăх тата строительство ыйтăвĕсемпе ĕçлекен комиссийĕн членĕ Этнер Егоров тата регион операторĕн – МВК «Экоцентр» обществăн – директорĕ Виктор Лагуновский каласа панă.

Чăваш культурин кунĕсем

Чăваш автономи облаçне йĕркеленĕренпе 100 çул çитнине халалласа Пушкăртстанра Чăваш культурин кунĕсем иртнĕ. Чăваш патшалăх академи юрăпа ташă ансамблĕн артисчĕсем тата Чăваш патшалăх филармонийĕн, çавăн пекех Чăваш патшалăх оперăпа балет театрĕн коллективĕсемпе солисчĕсем  Пушкăрт патшалăх оперăпа балет театрĕнче пысăк концерт кăтартнă. Çавăн пекех ЧР культура министрĕ Константин Яковлев Пушкăртстанри чăваш наци культура пĕрлĕхĕсен хастарĕсемпе тĕл пулнă. Театртах К. В. Иванов ячĕллĕ Чăваш патшалăх академи драма театрĕ Федор Павловă пьеси тăрăх лартнă «Ялта» драмăна кăтартнă.

Акци хатĕрленĕ

Театр çулталăкĕнче К.В.Иванов ячĕллĕ Чăваш патшалăх академи драма театрĕ хăйне евĕрлĕ акци хатĕрленĕ. Артистсем В. Со-

болевăн пьеси тăрăх лартнă «Космический спецназ» музыка юмахне Улатăр районĕнчи Çĕнĕ Эйпеçре, Комсомольски салинче тÿлевсĕр кăтартнă. Декабрĕн 21-мĕшĕнче юмах Тăвай районĕн культура çуртĕнче ку тăрăхри ачасене хăй патне пуçтарĕ.

Марафон старт илнĕ

Декабрĕн 10-25-мĕшĕсенче Чăваш Енре «Çĕнĕ çулхи республика» марафон иртет. Ăна Чăваш автономи облаçне туса хунăранпа 100 çул çитнине халалланă. Марафон Шупашкарти Трактор тăвакансен культура керменĕнче старт илнĕ. Çак тапхăрта республикăри хуласемпе районсенче 5 пин ытла мероприяти ирттерме палăртнă.

Урапа çинчи поликлиника

«Сывлăх сыхлавĕ» наци проекчĕпе килĕшÿллĕн район центрĕсенчен инçетре вырнаçнă ялсене тухса çÿреме республикăри чылай район больницине урапа çинчи поликлиникăпа тивĕçтернĕ. Кунта  ЭКГ аппарачĕ, спирограф, портативлă дефибриллятор, глюкометр, офтальмотонометр тата ытти  хальхи йышши хатĕрсем пур. Ял çыннисем вырăнтах медицина пулăшăвĕ илме май пулнишĕн кăмăллă.