Юратнă вулаканăмăрсем, почта ĕçченĕсем! Сире тата сирĕн çемйĕрсене çывхарса килекен Çĕнĕ çул уявĕпе чун-чĕререн, ăшшăн саламлатпăр.

Черетлĕ 2019 çулпа сывпуллашатпăр. Сирĕншĕн те, "Авангард" хаçат ĕçченĕсемшĕн те вăл ырă пулăмсемпе асра юлатех. Район хаçатне вулакансен, çырăнса илекенсен йышĕ чакмасть. Çулленех эсир пирĕнпе пĕр йышра пулни савăнтарать. Унсăр пуçне эсир, хаклă вулакансем, хаçат содержанине пуянлатас тĕлĕшпе пирĕн çывăх пулăшакансем пулса тăратăр. Кăçал та Вăтаелĕнчи В. Яковлева, Çĕньялти Н. Квасова, Р. Нягин, Чăваш Ишекĕнчи С. Кулакова, Патăрьелĕнчи В. Антипов, А. Леонтьев, Г. Петрова, В. Осипов, Л. Сорокина, П. Ефимов, В. Платонов, Алманчăри П. Киргизов, Туçари А. Кузнецова, Именкассинчи М. Зейнетдинов, Сителти И. Лякова, Турханти Н. Пирожков, Первомайскинчи Я. Сорокин, Кĕçĕн Арапуçĕнчи В. Селиванов, Нăрваш Шăхалĕнчи Р. Павлова, С. Фролова, Тăрăнти В. Петров, Упамсари Е. Сымова, Кивĕ Ахпỹртри А. Павлов тата ыттисем те пирĕнпе çыхăну тытсах тăчĕç. Вĕсем общество шухăш-кăмăлне, çынсен ăс-тăнĕпе кăмăл-туйăмне, хăйсен патĕнче пулса иртекен мероприятисене çутатма тăрăшрĕç. Малашне те хастарлăх ан чактăрах обществăлла корреспондентсен. Сире çирĕп сывлăх, пултарулăхра çитĕнỹсем сунатпăр. Тепĕр çул та интереслĕ материалсем кĕтетпĕр.

Çĕршыв, республика, район тытса пыракан çул-йĕрпе паллаштарас, вулакансем патне илсе çитерес, умма лартнă тĕллевсене пурнăçлама хавхалантарас тата явăçтарас енĕпе райхаçата почта ĕçченĕсем те пысăк пулăшу кỹреççĕ. Информацие вăхăтра вырăна илсе çитересси вĕсен ăсталăхĕнчен тата çаврăнăçулăхĕнчен те килет-çке.

Тавах пурне те пирĕнпе çыхăнура пулнăшăн. Ăнăçупа хастарлăх яланах сирĕн шанчăклă çулташăрсем пулччăр. Малашне те пĕр-пĕринпе килĕштерсе ĕçлер. Тепĕр хут уяв ячĕпе пурне те!

"Авангард" хаçат редакцийĕ.