Тăван çĕршывăн Аслă вăрçин ветеранĕсем Çĕнтерÿ 75 çул çитнĕ ятпа 75-шер пин тенкĕ илĕç. Тыл ĕçченĕсене те укçан пулăшĕç. Майăн 9-мĕшĕ тĕлне вĕсене 50-шер пин тенкĕ пама палăртнă. Кун пирки çĕршыв ертÿçи Владимир Путин Санкт-Петербургра ĕçлĕ визитпа пулнă чухне пĕлтернĕ.

Чăваш Республикин Ĕçлев министерствин пресс-служби пĕлтернĕ тăрăх, пирĕн республикăра пĕр хутчен паракан тÿлеве 500 ытла ветеран тата вĕсенпе танлашнисем илĕç. Хавхалантарма палăртнă тыл ĕçченĕсем — 9500 çын.

Палăртмалла: ытти çулсенче çак уяв ячĕпе ветерансене 10-шар пин, тыл ĕçченĕсене 5-шер пин тенкĕ панăччĕ.

Юбилейлă çулта Аслă Çĕнтерĕве халалланă мероприятисем пĕтĕм республикипех, вăл шутра пирĕн районта та  иртĕç.

А. Ильин