СССР Художниксен союзĕн членĕ, Харьковри ỹнер институтĕнче тăрăшнă Алексей Кокель (13.03.1880-04.02.1966, Турхан ялĕ) çуралнăранпа - 140 çул.

А. Кокель академи пĕлĕвĕ илнĕ пĕрремĕш чă-ваш ỹнерçи, профессиллĕ чăваш ỹнер искусствин никĕсне хываканĕ, Украинăри станок живопиçне пуçласа йĕркелекенĕ. 1903 çулта Санкт-Петербургри художество академийĕ çумĕнчи шкулта, 1906 çулта педагогикăн аслă курсĕнче, 1912 çулта Петербургри академи çумĕнчи художество аслă училищинче вĕреннĕ.

Алексей Афанасьевич Украинăри иккĕмĕш аслă художество вĕренỹ заведенийĕн йĕркелỹçи тата ректорĕ пулнă. Унта вăл мĕн виличченех профессор тата кафедра заведующийĕ, Киеври художество институчĕн профессорĕ пулса тăрăшнă. Вăлах Украинăри художество ассоциацийĕн йĕркелỹçи тата председателĕ те пулнă.

Ентеш хăйĕн ỹкерчĕкĕсемпе тĕнчери, çĕршыври, республикăри выставкăсене хутшăннă. Унăн ĕçĕсем Чăваш патшалăх художество музейĕнче упранаççĕ, Раççей, Украина музейĕсемпе уйрăм çынсен коллекцийĕсенче те сахал мар.

Тĕп ĕçĕсем çаксем: "Портрет чувашской женщины", "Уральские заводы", "Итальянцы", "Из чувашской сюиты", "Извозчик", "Венчание. Чуваши", "В чайной", "Семейный портрет", "Старый рабочий", "На посту", "Награждение ударницы", "Ликбез", "На соляных промыслах", "Колхозный базар", "Зима", "Лилии", "Березовая роща", "Несение с Голгофы", "Академии", "Улицы в Твери" тата ыттисем те.

Харьковра А. Кокеле асăнса унăн вилтăпри çине палăк лартнă. Ỹнерçĕ ячĕпе Шупашкарта пĕр урам хисепленет. И. Н. Ульянов ячĕллĕ Чăваш патшалăх университетĕнче 2009 çулта ентешĕмĕр музейне уçнă.

("Çулталăк кĕнекинчен")