«Вăрçă ачисен» статусне çирĕплетесшĕн

ЧР Пуçлăхĕн тивĕçĕсене вăхăтлăх пурнăçлакан Олег Николаев ĕç тăвакан власть органĕсен тата муниципалитетсен ертÿçисемпе ирттернĕ канашлура «вăрçă ачисен» статусне çирĕплетме ыйтакан нумаййи çинчен каласа ку ыйтăва татса памалли пирки сăмах пуçарнă. Олег Алексеевич иккĕленмест: халь бюджета çирĕплетнĕ, çавна май хальлĕхе вăрçă ачисен социаллă хÿтлĕхне пырса тивекен, укçапа çыхăнман мерăсене палăртма пулать. Тĕрĕссипе, паянхи лару-тăру çапларах — укçапа çыхăнман мерăсем финанс мерисенчен те пĕлтерĕшлĕрех пулса тăма пултараççĕ. Хайхи статуса укçапа çыхăннă мерăсемпе «пуянлатмалли» мерăсем патне вара каярахпа таврăнма май пулĕ. Çак категорие Раççейĕн 1927 çулхи июнĕн 22-мĕшĕнчен пуçласа 1945 çулхи сентябрĕн 3-мĕшĕччен çуралнă гражданĕсене кĕртесшĕн.

Ҫур аки иртерех пуçланĕ

Министрсен Кабинечĕн ЧР Пуçлăхĕн тивĕçĕсене вăхăтлăх пурнăçлакан Олег Николаев ертсе пынипе иртнĕ ларура çуракине хатĕрленес ыйтупа ял хуçалăх министрĕ Сергей Артамонов сăмах илнĕ. Вăл çирĕплетнĕ тăрăх, кăçалхи ĕççи юлашки 10 çулти чи ир пуçланаканни пулать. Ку, паллах, хĕл ăшă, юр сахал пулнипе çыхăннă. Çавăнпа тăпрара нÿрĕк виçи те пĕчĕк. Улатăр, Патăрьел районĕсенче — пушшех. Акă мĕншĕн, министр шучĕпе, çуракине иртерех, уйсем типсе кайиччен, тухса кĕске вăхăтра вĕçлекенсен тырăллă пулас шанăçĕ пысăкрах. 310 пин гектара акса-лартса хăвармалла. Кĕрхи культурăсемпе шутласан кăçал тыр-пул пухса кĕртмелли лаптăксем пĕтĕмпе 548 пин гектарпа танлашĕç. Ку пĕлтĕрхинчен 6,6 пин гектар нумайрах. Кĕркунне пысăк лаптăка — 93 пин гектар ытла — акса хăварни çуркуннехи ĕçе çăмăллатĕ. Чылай районта кĕрхи культурăсене, нумай çул ÿсекен культурăсене апатлантарма пуçланă. Вĕсем аван хĕл каçнă, калчасен пĕтнĕ пайĕ 5% çеç — нормăран ытла мар.

Коронавирус инфекцийĕ витĕм кӳмĕ

Республикăн çар комиссариачĕ призыв кампанине ăнăçлă йĕркелесе округра 1-мĕш вырăна çĕнсе илнĕ, вымпела тивĕçнĕ. Сăмах май, асăннă вымпел пĕлтĕр те Чăваш Енре пулнă. Çуркуннехи призыва коронавирус инфекцийĕ витĕм кÿмĕ — çакна оборона министрĕ Сергей Шойгу çирĕплетнĕ ĕнтĕ. Чăн та, республика комиссарĕ Александр Мокрушин палăртнă тăрăх, вăл кăшт каяраха куçать: çамрăксен тĕп йышне Çĕнтерÿ юбилейĕпе çыхăннă мероприятисем хыççăн — май уйăхĕн вĕçĕнче, июнь уйăхĕн пуçламăшĕнче — çара ăсатĕç.

Виçĕ станци хута ярасшăн

Министрсен Кабинечĕн ЧР Пуçлăхĕн тивĕçĕсене вăхăтлăх пурнăçлакан Олег Николаев ертсе пынипе иртнĕ ларура газ автозаправка станцийĕсен сетьне аталантарасси çинчен транспорт министрĕ Владимир Осипов каласа панă. АЗСсем тумалли тăкаксене саплаштарассине татса панă. 2020 çул валли 120 миллион тенкĕ уйăраççĕ. Тĕп пайĕ — федераци бюджетĕнчен. Кăçал виçĕ станци хута ярасшăн.