Шкулсене çĕнĕ вĕренỹ çулне хатĕрленĕ чухне кашнийĕшĕнчех мĕн те пулин çĕнни куç тĕлне пулать. Вĕсене ачасен тавракурăмне анлăлатас, ăс-тăнне çирĕплетес тĕллевпе те кĕртеççĕ. Пушă вăхăта усăллă ирттерме майсем туса пама тăрăшнине те ырламалла. Тĕслĕхе Тутар Сăкăтĕнчи вăтам шкулах илер . Иккĕмĕш хутри коридорти уçă вырăнта вĕсем шахматла вылямалли илĕртỹллĕ кĕтес йĕркеленĕ. Фигурăсене сĕтел хушшине ларса та, ура çинчен те куçарма пулать. Харăсах темиçе мăшăр выляма пултарать. Кружок йĕркеленĕ. Ăна И. Козлов физкультура учителĕ ертсе пырать. Икĕ ушкăна 32 ача çỹрет.

Вăййа юратакансем районти, республикăри ăмăртусене, олимпиадăсене хутшăнаççĕ. Вĕсен çитĕнĕвĕсемпе Д. Айзатуллова вĕренекен кăмăлтан паллаштарать. А. Куликов, Н. Гайнуллин, И. Алиуллов, Д. Айзатуллов, А. Хамидуллов тата ыттисем те пĕр хутчен çеç мар çĕнтерỹçĕсем пулчĕç.

- Шахматла выляма юратакан ача компьютер умĕнче кирлĕ-кирлĕ мар вăйăпа интересленсе ларса вăхăта сая ямастех. Юлташĕсемпе сĕтел хушшинче пуçа тарăннăн шутлаттарма хăнăхать,- тет шкул директорĕ Г. Сабитова.

А. ИВАНОВА.