Коронавируспа чирлисен шучĕ тĕнчере, çĕршывра кунсерен ÿссех пырать. Вĕсен йышĕ республикăра 19 çынна çитнĕ (пĕри больницăран сывалса тухнă). Çавна май Чăваш Енре те коронавирус инфекцийĕ сарăлассипе кĕрешес туртăм çирĕпленет.

Акă, апрелĕн 7-мĕшĕнчен тытăнса республикăна çĕршывăн ытти регионĕсенчен килекенсен 14 кун хушши хăйсем пурăнакан вырăнтан ниçта та тухса çÿремелле мар. Кун пирки калакан 98-мĕш номерлĕ указа Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев 2020 çулхи апрелĕн 7-мĕшĕнче алă пуснă.

Çавăн пекех маларах йышăннă тăтăшах килте пулмалли йĕркене те çирĕп пăхăнмалла. Кĕтмен тĕслĕхсемсĕр, ĕç вырăнне кайса  çÿренисĕр, лавккана е аптекăна тата çÿп-çап тăкма тухса кĕнисĕр пуçне. Хула çумĕнчи рейссемпе (пригородный) пассажирсене турттаракан транспорт 5 сехетрен пуçласа 9 сехетчен, 12 сехетрен пуçласа 14 сехетчен, 17 сехетрен пуçласа 20 сехетчен çеç рейса тухать.

Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев 2020 çулхи апрелĕн 7-мĕшĕнчех коронавирус чирĕнчен сыхланас тĕлĕшпе  99-мĕш номерлĕ указ та алă пуснă. Унпа килĕшӳллĕн Чăваш Республикинчи ĕç тăвакан власть органĕсене 2020 çулхи апрелĕн 3-мĕшĕнче йышăннă 92-мĕш номерлĕ указа пăхăнманнисен ячĕпе нормативлă протоколсем çырма ирĕк панă.

Асăннă чарусене йышăнни пĕтĕмпех коронавирус инфекцийĕ сарăлса пынипе çыхăннă.

А. Иванов