Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаевăн 2020 çулхи апрелĕн виççĕмĕшĕнче коронавирус чирне сарăлма парас марришĕн кăларнă 92-мĕш указĕпе килĕшỹллĕн район администрацийĕ "Указа пăсакан фактсене тупса палăртассипе яваплă çынсене çирĕплетесси пирки" хушу кăларнă.

Ятарлă комисси апрелĕн 8-мĕшĕнче çак указа мĕнлерех пурнăçланине тĕрĕслеме рейда тухрĕ. Комисси членĕсем ушкăнсене пайланчĕç. Пĕрисем ял тăрăхĕсенче хальхи çăмăл мар лару-тăрури халăх ăнланулăхне пăхрĕç, теприсем лавккасем тăрăх çỹрерĕç.

Иртнĕ эрнере апат-çимĕç, куллен кирлĕ таварсене сутакан суту-илỹ точкисем çеç ĕçлерĕç. Çур аки пуçланнă май апрелĕн 6-мĕшĕнчен сентрере юсав пайĕсем, пахчара усă курмалли таварсем, вăрлăхсем пур лавккасем те ĕçе пикенчĕç.

Комисси членĕсем кашнине кĕрсе тухрĕç. Чылайăшĕнче витринăсене, урайне дезинфекцилеме ятарлă савăт уйăрман е пачах та çук. Туянакансене валли дистанци те палăртман. Çавăн пекех ỹт температурине виçме градусник та çук, температурăна çырса пымалли журнала та тытса пымаççĕ. Комисси членĕсем çитменлĕхсене пĕтермелли пирки асăрхаттарусемпе пĕрлех административлă йышăнусем тума 6 акт çырчĕç. Çакăн пек рейдсем кулленех пулаççĕ.

О. БЕЛЬДЕКОВА