Раççей Федерацийĕн Правительствин Председателĕ Михаил Мишустин 2020 çулхи апрелĕн 3-мĕшĕнче алă пуснă  хушупа Чăваш Республикин 2020-2024 çулсенчи социаллă пурнăçпа экономика аталанăвĕн уйрăм программине çирĕплетнĕ.

Унта Чăваш Енĕн социаллă пурнăçпа экономика аталанăвĕн паянхи çăмăл мар лару-тăрăвне хакланă: экономикăн чĕр тавар отраслĕсемпе çыхăннă питĕ пысăк тупăш паракан сегменчĕсем çукки, халăх йышĕ пысăккине кура регион тулашĕнчи ĕç миграцийĕ анлă сарăлни, кредит илнисен шучĕ ÿссе пыни…Программа тĕллевĕ – республикăра пысăк инвестици проекчĕсене пурнăçа кĕртмелли условисем йĕркелесси, ĕç тухăçлăхне ÿстересси, пĕчĕк тата вăтам предпринимательлĕхе вăй парасси, çынсен пурнăç шайне ÿстерсе чухăнлăха чакарасси.

Документра республикăра инвестицисене явăçтармалли проектсен шутĕнче Юхмапа Пăла тăрăхĕнче агропромышленность паркне йĕркелесе ярасси те пур. Вăл ĕçлесе кайсан район экономики тĕрекленнипе пĕрлех хушма ĕç вырăнĕсем те пулĕç. Çак проектсене пурнăçа кĕртме федераци бюджетĕнчен çуллен уйăрмалли укçа виçине те çирĕплетнĕ. Хушура 2024 çулта программăна пĕтĕмлетсе, унта хушма мероприятисем кĕртсе вĕсене пурнăçламалли вăхăта 2025-2027 çулсем валли тăсма, çак тĕллевпе 5 миллиард тенкĕ таран уйăрма пултарассине палăртнă.

А. Ильин.

Олег Николаев, Чăваш Республикин Пуçлăхĕн тивĕçĕсене вăхăтлăх пурнăçлакан:

_ Программăна хатĕрленĕ чухне кашни пункта уйрăммăн пăхса тухрăмăр, ăна хÿтĕлес тесе тап-хăрăн-тапхăрăн ĕçлерĕмĕр. Унта  палăртнă мероприятисене пурнăçа кĕртнĕ май республикăн экономикине, социаллă пурнăçне палăрмаллах лайăхлатма май килĕ. Çĕнĕ производствăсем хута кайĕç, çĕнĕ ĕç вырăнĕсем пулĕç, инфратытăм хăтлăланĕ. Малашне ырă улшăнусене республикăри кашни çын туйĕ.