Социализм Ĕçĕн Геройĕ, Тăван çĕршывăн Аслă вăрçин участникĕ Илларион Евдокимович Перепелкин (24.04.1895 - 09.10.1969. Анат Туçа ялĕ) çуралнăранпа - 125 çул.

И. Перепелкин 1933 çултанпа "Гвардеец" колхозăн уй-хир бригадин бригадирĕнче ĕçленĕ. Демобилизаци хыççăн та çак ĕçрех малалла вăй хунă. Ĕçе йĕркелесе пыма пĕлнĕрен кăтартăвĕсем лайăхланса пынă. 1947 çулта бригада кашни гектартан 31,9 центнер тулă пухса кĕртнĕ.

Илларион Евдокимовича Ленин орденĕпе, медальсемпе наградăланă. 1948 çулта ăна пысăк тухăçлă тулă çитĕнтернĕшĕн Социализм Ĕçĕн Геройĕ ятне панă.

 Зооинженер, ял хуçалăх наукисен докторĕ (2006), профессор (2006), Чăваш Республикин тава тивĕçлĕ вĕрентỹ ĕçченĕ (2003), Раççей агропромышленность комплексĕн хисеплĕ ĕçченĕ (2011) Александр Васильевич Шилов (26. 04. 1960 - 28. 03. 2014, Çĕнĕ Ахпỹрт ялĕ) çуралнăранпа - 60 çул.

А. Шилов ĕçлĕ кун-çулне "Родина" колхозра водителтен пуçланă. 1986 çулта Чăваш патшалăх ял хуçалăх институчĕн (халĕ ял хуçалăх университечĕ) зооинженери факультетĕнчен вĕренсе тухнă хыççăн 2014 çулччен çакăнта ассистент (1986-1990), аслă преподаватель (1990-1995), доцент (1996-2006), профессор (2006 çултанпа), кафедра заведующийĕ (2001-2009), зооинженери факультечĕн деканĕн çумĕ (1990-1993), куçăмсăр майпа пĕлỹ илекенсен зооинженери факультечĕн деканĕн çумĕ (1995-1997), 2002 çултан пуçласа 2013 çулсенче воспитани енĕпе ĕçлекен проректор, 2013-2014 çулсенче пĕтĕмĕшле тата уйрăм зоотехни кафедрин профессорĕ пулнă.

Наука тĕпчевĕсен тĕп енĕ - сысна самăртас тата çитĕнтерес технологин çĕнĕлĕхĕсем.

Александр Васильевич 110 ытла наука ĕçĕсен, 10 вĕрентỹ тата вĕрентỹпе методика пособийĕсен, монографисен авторĕ.

("Çулталăк кĕнекинчен").