ÇУ кунĕсенче ялта пурăнакансем час-часах мунча хутса çăвăнаççĕ. Пахчара ĕçленĕ хыççăн пушшех кирек камăн та тасалас килет. Анчах та çак киленỹ усал ĕçпе ан çыхăнтăр тесен мунча хутнă чухне пушар хăрушсăрлăх йĕркисене çирĕп пăхăнмалла. Чăн малтанах çунакан кăмакана тимлĕхсăр пăрахса хăвармалла мар. Çуллахи кунсенче мунчана çав тери вăйлă хутни те хăрушлăхпах çыхăннă, кăмака хĕрсе кайса хăвăрт тивекен япаласенчен çулăм кăларма пултарать. Мăрьесене, электропроводкăсене юсавлă тытни те инкекрен сирĕ. Районта шута илекен пушарсен пысăк пайĕ шăпах мунчапа çыхăннăскерсем. Çавăнпа та ăна хутассине пĕчĕк е çăмăл ĕç вырăнне хумалла мар.