Район полицийĕн ветеранĕсем паянхи сотрудниксемшĕн ырă тĕслĕхлĕ. Вĕсем яланах пирĕнпе юнашар, стройра. РФ ШĔМĕн районсем хушшинчи "Батыревский" уйрăмĕнче нумай çул ĕçлесе тивĕçлĕ канăва тухнă полици ветеранĕсем сахал мар. Чăваш полицине туса хунăранпа (июлĕн 4-мĕшĕнче) 100 çул çитнĕ май хăш-пĕр ветеран-сотрудниксен пархатарлă ĕçĕсем пирки аса илесшĕн.

Акă, ветерансен канашĕн председателĕ А. Якимов, (ỹкерчĕкре полици начальникĕпе А. Фоминпа) тивĕçлĕ канăва тухни 23 çул. Çапах та вăл хальхи вăхăтра та полици сотрудникĕсемпе çыхăнăва татмасть. Вăл право хуралĕн йĕркинче 30 çул тăрăшнă. Рядовой милиционертан милици начальникне çитнĕ. Ачалăхри ĕмĕчĕ пурнăçланнăран Аркадий Иванович паянхи кун та савăнать. Шăпăрлан чухнех милици сотрудникĕсем çине ăмсанса пăхнине кăмăлтан аса илет. Пур çĕрте те çирĕп йĕрке тăвакансем, ятарлă тумпа, пакунпа çỹрекенсем ăна çав тери килĕшнĕ.

Çамрăкла тĕвĕленнĕ ĕмĕтне пурнăçа кĕртес тĕллевпех вăтам шкултан вĕренсе тухнă хыççăн икĕ çул çар службинче пулнă каччă салтак гимнастеркине милиционерăн тумĕпе улăштарать, хăйсен районне (Элĕк районĕнчен) мар, Патăрьелĕнчи йĕрке хуралне ĕçе вырнаçать. Каярахпа Елабугăри милиционерсен шкулĕнчен, СССР ШĔМĕн Киеври аслă шкулĕнчен вĕренсе тухать. Çакăн хыççăн тăрăшуллă та çирĕп кăмăллă çамрăк сотрудника тỹрех шалти ĕçсен пайĕн начальникĕн оперативлă ĕçсемпе тимлекен çумĕ пулма шанаççĕ. Ун хыççăн вăл нумай çул полици начальникĕнче ĕçленĕ, служба ĕçне тỹрĕ кăмăлпа пурнăçласа пынăшăн тĕрлĕ шайри Хисеп грамотине, Тав хутне, ытти наградăна тивĕçнĕ.

Паян ветерансен канашĕн председателĕ пирĕн коллектившăн хисеплĕ те сумлă ветерансенчен пĕри. Вăл тăтăшах çамрăксем хушшинче пулма, вĕсене çăмăл мар службăра ырă канашпа пулăшма тăрăшать.

- Патăрьел милицийĕн сотрудникĕсем республикăра яланах кăтартуллисен йышĕнче пулнă. О. Антонов аслă участковăй, начальникĕн воспитани енĕпе тимлекен çумĕнче тăрăшнă А. Долговпа, В. Купцов участковăйпа, уголовлă шырав ĕçĕн оперуполномоченнăйĕпе О. Кошкинпа, Г. Краснов, Л. Степанов следовательсемпе, Ф. Урмаковпа служба тивĕçне пурнăçласа пуç хунă А. Портновпа, П. Крылов милиционер-водительпе тата ыттисемпе те пĕр чĕлхе тупса ĕçлеме тỹр килнĕшĕн Турра тав тăватăп. Кашни сотрудник хăйсен ĕçне пĕлсе тата пысăк пахалăхпа тума тăрăшнăран районти шалти ĕçсен пайĕ республикăра чылай чухне малтисен шутĕнче пулнă. Чăваш Республикинчи йĕрке хуралĕ 100 çул тултарнă май оперативлă службăн ырă ĕçĕсене, пархатарлă сотрудникĕсене аса илни, вĕсен умĕнче пуç тайни кирлех тесе шутлатăп. Милици сотрудникĕсем пĕрле, йышпа пысăк ĕç тунă, районта тăнăçлăха тытса тăнă,- ырăпа аса илет Аркадий Иванович служба вăхăтĕнчи яваплă тапхăра.

 Шăпа А. Якимова Юхмапа Пăла тăрăхнех тĕпленме çырнă. Мăшăрĕпе - Мария Ивановнăпа - хĕрпе ывăл çитĕнтерсе аслă çул çине кăларчĕç. 14 çул И. Н. Ульянов ячĕллĕ Чăваш патшалăх университечĕн Патăрьелĕнчи филиалĕнче преподавательте ĕçленĕ хыççăн пушă вăхăтне килтех ирттерет, мăнукĕсемпе савăнать. Час-часах пирĕн ĕçре пулать, ветерансемпе тĕл пулу йĕркелет, мероприятисене хутшăнать. Иртнисĕр малашлăх çук теççĕ. Районти шалти ĕçсен пайĕнчен ĕçлесе тивĕçлĕ канăва тухнă хисеплĕ ветерансем паянхи çамрăксемшĕн ырă тĕслĕх.

Н. АНДРЕЕВ, РФ ШĔМĕн районсем хушшинчи "Батыревский" уйрăмĕн начальникĕн çумĕ, шалти ĕçсен службин капитан