Лана Прусаковăпа Дмитрий Мулендеева 2020/2021 сезон командине кĕртнĕ

Республикăри Олимп резервĕсен 2-мĕш спорт шкулĕн фристайл уйрăмне çӳрекен, Раççей спорт мастерĕсене Лана Прусаковăпа Дмитрий Мулендеева 2020/2021 сезонра фристайл енĕпе слоуп-стайл тата биг-эйр дисциплинăсенче вăй виçме Раççейĕн пĕрлештернĕ командин йышне кĕртнĕ.

Спортсменсене фристайл енĕпе нацин пĕрлештернĕ командин аслă тренерĕ, чăваш фристайл шкулĕн вĕренекенĕ Никита Васильев тата Даниил Калачев хатĕрлĕç.

Раççей Фристайл федерацийĕн президенчĕ Алексей Курашов палăртнă тăрăх, фристайлăн çĕнĕ дисциплинисене ытларах çамрăк ăрăва явăçтарма тăрăшаççĕ. Çĕнĕ сезонра альтернативлă хатĕрленӳ мелĕсем пулассине те пĕлтернĕ вăл, мĕншĕн тесен чикĕ леш енне тухса çӳресси пирки хальлĕхе шухăшламалли те çук.

Республикăра 82 йĕкĕреш çуралнă

Ача — çемье телейĕ. Унăн сассипе кил-çурт тулать. Çемьере харăсах икĕ пепке кун çути курни ашшĕ-амăшне тата телейлĕрех тăвать.

Çулталăк пуçланнăранпа республикăра 82 йĕкĕреш çуралнă: 52-шĕ — Шупашкарта, 6-шĕ — Канашра, Элĕк, Вăрнар, Куславкка, Муркаш, Пăрачкав, Çĕрпÿ, Шупашкар, Етĕрне районĕсенче — 2-шер, Улатăрпа Çĕнĕ Шупашкарта — 4-шар.

2019 çулта Чăваш Енре 239 йĕкĕрешпе 6 виçĕреш кун çути курнă. Палăртса хăварар, кăçал республикăра 4454 ача çуралнă. Вĕсенчен 2280-шĕ — арçын ача, 2174-шĕ — хĕрача.