ЧĂВАШ Республикинчи Роспотребнадзор управленийĕн территори пайĕн врач пулăшуçи Лидия Никитина хаçат редакцине пĕлтернĕ тăрăх, кăçал, ытти çулпа танлаштарсан, сăвăс сахалтарах. Ку таранччен районта çакнашкал сăлтавпа икĕ çынна çеç пулăшу пама тивнĕ. Вĕсенчен пĕри çул çитмен ача, тепри - аслă çулхи çын. Иккĕшĕн çинчи сăвăса та вăхăтра кăларнă, ăна лабораторие яма сăлтавĕ пулман.

Роспотребнадзор специалисчĕ юлашки çулсенче сăвăс вăрманта çеç мар, килти пахчасенчех тĕл пулнине çирĕплетет. Кăçалхи тĕслĕхсем те иккĕшĕ те кил хуçалăхĕнчех пулса иртнĕ. Республикипе вара апрель тата май уйăхĕсенче 130 çын ỹте сăвăс кĕрсе ларнăран тухтăрсенчен пулăшу ыйтнă. Вĕсенчен çуррине яхăн _ ачасем. Лидия Максимовна çирĕплетнĕ тăрăх, çыннăн сывлăхне сиен кỹрекен сăвăс пирки юлашки çулсенче районта пурăнакансем чылайăн кăсăкланаççĕ. Нумай пулмасть республикăра Роспотребнадзор коронавирус чирĕпе çыхăннă ыйтупа йĕркеленĕ "тỹрĕ линире" те çынсем сăвăс пирки ыйтусем хускатнă.