ПАТĂРЬЕЛĔНЧИ кульурăпа кану центрĕн работникĕсем районта иртекен кашни мероприятирех хăйсен творчество ăсталăхне, пултарулăхне кăтартаççĕ, çĕнĕрен те çĕнĕ инсценировкăсем, юрă-ташăпа куракана савăнтараççĕ. Çапла тума вĕсене чăн малтанах хăйсен професси ăсталăхне ỹстерсе пыни пулăшать. Акă, çак кунсенче çеç массăллă представленисен режиссерĕ Анастасия Якушкина "Культура" наци проекчĕпе килĕшỹллĕн Кемерово хулинче "Культурăпа массăллă мероприятисен режиссурин тĕп никĕсĕ" программăпа квалификацие ỹстермелли курсран вĕренсе килнĕ. Ытти чухне те сцена илемĕ шутланакан Анастасия Витальевнăшăн çакă малашне тата ытларах хавхаланса ĕçлемелли сăлтав пулĕ.