Михаил Ноздряков –пĕрремĕш вице-премьер
ЧР Пуçлăхĕн тивĕçĕсене вăхăтлăх пурнăçлакан Олег Николаев финанс министрне Михаил Ноздрякова ЧР Правительствин пĕрремĕш вице-премьерне çирĕплетни пирки калакан хушăва алă пуснă. Вице-премьерсем тăваттăн юлнă: Сергей Артамонов, Иван Моторин, Петр Чекмарев, Алла Салаева.
Медицина ĕҫченĕсене саламланă
ЧР Правительство çуртĕнче ВКС мелĕпе шурă халатлисене Медицина ĕçченĕсен кунĕ ячĕпе саламланă. Аса илтеретпĕр: сывлӑх хуралĕнче ĕҫлекенсен кунне ҫулсеренех июнĕн виççĕмĕш канмалли кунĕнче уявлаççĕ. ЧР Пуçлӑхĕн тивĕçĕсене вăхăтлăх пурнăçлакан Олег Николаев, Раççей Федерацийĕн сывлăх сыхлавĕнчи надзор службин пуçлăхĕ Алла Самойлова, ЧР сывлӑх сыхлавĕн министрĕ Владимир Степанов,"Пĕрле" фончĕн попечительсен канашĕн ертÿçи Вячеслав Александров саламланă. Видеоконференци мелĕпе çыхăнăва республикăри 60 ытла медицина учрежденийĕ тухнă. Чăваш Енри сывлăх сыхлавĕнче 27 пин ытла çын ĕçлет. Вĕсенчен 5000-шĕ - тухтăрсем, 12 пине яхăн - вăтам, 1 пине яхăн кĕçĕн медицина персоналĕ. Эпидеми лару-тăрăвĕнче, çăмăлах мар вăхăтра ĕçлеççĕ паян шурă халатлисем. Хăшĕсен талăкĕпех вăй хума тивет.
Çул-йĕр ыйтăвĕсене пăхса тухнă
Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев транспорт комплексĕн тата çул-йĕр хуçалăхĕн организацийĕсен представителĕсемпе канашлу ирттернĕ. Канашлăва хутшăнакансем палăртнă тăрăх, республикăра ку отрасле аталантарассине пысăк тимлĕх уйăраççĕ. ЧР Транспорт министерстви 2024 çулччен çулсене лайăхлатмалли стратеги туса хатĕрленĕ. Транспорт комплексĕн тата çул-йĕр хуçалăхĕн малашлăхĕпе çыхăннă ыйтусене регионăн социаллă-экономика аталанăвĕн комплекслă программине те кĕртнĕ. Сăмах май, çак программăпа июнĕн 24-мĕшĕнче паллаштарĕç. Канашлура çул-йĕр хуçалăхĕн организацийĕсенче тăрăшакансем хăйсен шухăшĕсене те, сĕнĕвĕсене те пĕлтернĕ, малашлăх тĕллевĕсене палăртнă.
Шупашкарта парад пулмĕ
Июнĕн 24-мĕшĕнче Мускавра Çĕнтерÿ парачĕ иртĕ. Çак кун çĕршывĕпех кантарĕç. Шупашкарта вара парад пулмĕ. «Тăван çĕршывăн Аслă вăрçинче çĕнтернĕренпе 75 çул çитнине халалланă парад Чăваш Енре пулмасть. Массăллă мероприятисем ирттерме юрамасть-ха», _ тенĕ ЧР Пуçлăхĕн тивĕçĕсене вăхăтлăх пурнăçлакан Олег Николаев Инстраграмри страницинче.
Маркăсем кăларнă
Чăваш автономи облаçне туса хунăранпа 100 çул çитнине халалласа наци гербне ÿкернĕ марка туса кăларнă. Ун çине герб, чăваш орнаментне, регионти паллă вырăнсене тата символсене ÿкернĕ. Пĕтĕмпе 1 пин экземпляр кăларнă.
АПКра тăрăшакансен шалăвĕ ÿсет
Республика уй-хирĕнче, выльăх фермисенче, сунар хуçалăхĕсенче тăрăшакансен, вĕсенче пулăшу ĕçне пурнăçлакансен 2020 çулхи апрельти ĕç укçи 25144,5 тенкĕпе танлашнă. Чăваш Ен агропромĕнче вăй хуракансен вăл кăçалхи январь-апрель уйăхĕсенче çулталăк каяллахинчен пысăкрах. Федерацин Атăлçи округĕнчи регионсен хушшинче Чăваш Ен ку енĕпе Тутар, Пушкăрт тата Удмурт республикисене, Чулхула, Саратов, Ульяновск, Оренбург облаçĕсене, Пермь крайне хыçала хăварса улттăмĕш вырăна йышăннă. Чăвашстат пĕтĕмлетĕвĕ тăрăх — палăртнă тапхăрта 2019 çулхи çав хушăринчен шалу АПК ĕçченĕсен — 13,4%, çав шутра ял хуçалăхĕнче 22,6% ÿснĕ.
