Аталану программине хатĕрлесси вĕçленсе пырать

Шупашкарти оперăпа балет театрĕнче Республика кунĕнче Чăваш Енĕн социаллă пурнăçпа экономика аталанăвĕн программин презентацийĕ пулнă. Аслă экономика канашĕн членĕсемсĕр пуçне унта ЧР Пуçлăхĕн тивĕçĕсене вăхăтлăх пурнăçлакан Олег Николаев, РФ Федераци Канашĕн председателĕн пĕрремĕш заместителĕ Николай Федоров, Патшалăх Думин депутачĕ Анатолий Аксаков, ыттисем хутшăннă. Документ авторĕ — Пĕтĕм тĕнчери регионсен аталанăвĕн центрĕн гендиректорĕ Игорь Меламед республика чылай çул нумай енĕпе ытти регионтан юлса пынине палăртнă, программа инвестицисене ÿстерме, çĕнĕ ĕç вырăнĕсем йĕркелемешкĕн пулăшма, çынсен тупăшне пысăклатма тивĕç. Çав шутра паян Чăваш Енре пурăнакан, анчах ютра ĕçлекен 70 пин çын тăван региона таврăнса кунта ĕçлеме пуçламалла.

 Çĕнĕ произодство хута кайнă

ЧР Пуçлăхĕн тивĕçĕсене вăхăтлăх пурнăçлакан Олег Николаев Канаш тăрăхĕнче пулнă. Чи малтан вăл Канаш хулинче çĕр айĕнче хунă пысăк давлениллĕ газ пăрăхĕсене ĕçе кĕртнине çирĕплетсе "кăвак çулăм" çутнă. Унтан индустри паркĕнче холодильниксем тăвакан çĕнĕ производствăна хута яма хутшăннă. Светлана Ардентова директор пĕлтернĕ тăрăх, заводра 30 ытла çын ĕçлет. Олег Алексеевич Канашри элеватора та çитсе курнă. Çавăн пекех Росагролизинг пулăшнипе Канаш районĕнчи "Пионер" хуçалăх çĕнĕ агротехникăпа пуянланнă

Хĕрарăмсен союзĕн съезчĕ иртнĕ

Республикăри «Хĕрарăмсен союзĕ» общество организацийĕн черетлĕ XIX съезчĕ  иртнĕ. Съезд ĕçне ЧР Пуçлăхĕн тивĕçĕсене вăхăтлăх пурнăçлакан Олег Николаев, РФ Федераци Канашĕн председателĕн пĕрремĕш заместителĕ Николай Федоров, РФ Патшалăх Думин депутачĕ Анатолий Аксаков та хутшăннă. Унта 2017 çулхи сентябрьтен пуçласа паянхи кунччен организаци тунă ĕçсемпе паллаштарнă. Хĕрарăмсен союзĕн хастарĕсем пĕр сасăллăн пулса ку тивĕçе малашне пурнăçлама Наталья Николаевăна шаннă.

Сăнавçăсем сасăлава хатĕр

ЧР Общество палатинче общество сăнавçисем Раççей Конституцине кĕртмелли улшăнусем тĕлĕшпе июлĕн 1-мĕшĕнче иртмелли сасăлава хутшăнма мĕнле хатĕрленнине пресс-конференци ирттерсе пĕтĕмлетнĕ. Палата председателĕ Алексей Судленков палăртнă тăрăх, сăнавçăсен корпусĕ сасăлава хатĕр ĕнтĕ. Ятарласа вĕрентнĕскерсен йышĕ пысăк — 7 пин çын ытла, вĕсем кашни суйлав участокĕнчех пулĕç, сасăлав уççăн та саккунлă иртнине сăнĕç. Сасăлав вăхăтĕнче чиртен сыхланмалли хăрушсăрлăх мерисене çирĕп пăхăнма палăртнă. Маскăсем, перчеткесем, дезинфекци хатĕрĕсем — пĕтĕмпех шута илнĕ, вĕсемпе кашни суйлав участокне тивĕçтернĕ, саппас та пур.

«Эткер» ачасене кĕтет

Пултаруллă ачасемпе çамрăксен «Эткер» центрĕн ăслăлăх лабораторийĕсене уçнă. Сентябрĕн 1-мĕшĕнче вăл пĕрремĕш вĕренекенĕсене йышăнĕ. Çĕнĕ учреждени ĕçне йĕркелемешкĕн федераци бюджетĕнчен 213,6 миллион тенкĕ уйăрнă. Ачасем «Ăслăлăх», «Искусство», «Спорт» енсемпе пĕлĕве тарăнлатĕç, ăсталăха ÿстерĕç.

Хоккей центрĕ уçăлнă

Совет Союзĕн Геройĕ А.В.Кочетов ячĕллĕ Шупашкарти кадет корпусĕ çумĕнче регионти хоккей центрĕ уçăлнă. Вăл — «Демографи» наци проекчĕпе килĕшӳллĕн хута янă республикăри чи пысăк спорт объекчĕ. Пăр арени, 228 вырăнлăх трибуна, вĕрентӳ класĕсемпе тренажер залĕсем. Çамрăк хоккеистсем валли аталанмашкăн лайăх условисем пур.