Ĕнешĕн укçа пама тытăннă

Чăваш Енре ĕне усракансене укçа парса пулăшасси пирки хаçатра пĕлтернĕччĕ ĕнтĕ. Аса илтерер: пĕр ĕне усракансене – 2300, икĕ  ĕнешĕн кашнине – 3300, виçĕ тата ытларах ĕнешĕн кашниншӗн 4300 тенкĕ парĕç. Ку тÿлеве июнь вĕçĕнче пама тытăнассине каланăччĕ. Заявлени çырнă 747 çын çак пулăшăва тивĕçнĕ. Вĕсем патне çак укçа çитнĕ. Чăваш Енре çак патшалăх пулăшăвне 22 пин хуçалăх тивĕçĕ. Вĕсенче пĕтĕмпе 56 пин ытла ĕне. Ку тĕллевпе республика хыснинчен 185 миллион тенкĕ уйăрнă.

Мускава вĕçекен самолетсем йышланнă

Шупашкарти аэропорт тепĕр ырă хыпар пĕлтернĕ. Сăмахăмăр Мускава вĕçекен самолетсен расписанийĕ улшăнасси пирки пырать. Тĕрĕсрех каласан, каçхи рейссем юлĕç-ха. Ун çумне кăнтăрлахи хутшăннă. Июнĕн 26-мĕшĕнчен  «Победа» авиакомпани самолечĕсем Шупашкартан ирхине 10 сехет те 10 минутра вĕçме тытăннă. Çĕршывăн тĕп хулинчен ирхи рейс 8 сехет те 20 минутра пулать. Лоукостер самолетсене кашни кунах çÿретессине пĕлтернĕ. Çапла вара Шупашкартан кунне икĕ рейс пулĕ. Каçхи самолет Мускавран 19 сехет те 50 минутра хускалĕ, кунтан вăл 21 сехет те 45 минутра вĕçсе кайĕ. «Победа» малтанхиллех «Внуково» аэропорта илсе çитерет.

Конкурса хутшăнать

«Çулталăкри Раççей йывăçĕ – 2020» конкурса çĕршывĕпе 12 йывăç хутшăнать. Вĕсем Брянск, Карели, Белгород, Псков, Липецк, Кемĕр, Тамбов, Тверь облаçĕсенче, Мордва, Дагестан, Чăваш Ен, Мари республикисенче çитĕнеççĕ. Чăваш Енри юман 369 çулта, унăн çÿллĕшĕ – 24 метр. Муркаш районĕнчи Ильинка ялĕ таврашĕнче çитĕнекен юман республикăра чи ватти. 2012 çулта ăна Раççейри чи ватă йывăçсен реестрне кĕртнĕ. Юмана виçĕ хутчен аçа çапнă, çапах парăнман. Аса илтеретпĕр: çулталăкри тĕп йывăçшăн «Йывăçсем – чĕрĕ çут çанталăк палăкĕсем» наци программин сайтĕнче октябрĕн 1-мĕшĕччен сасăлама пулать. Конкурса хутшăнакан юман патне чылай çын курма çÿрет.

Шалу тÿлемен

РФ Следстви комитечĕн Чăваш Енри следстви органĕсем Шупашкарти строительство фирмин экс-директорĕ тĕлĕшпе уголовлă ĕç пуçарнă. Ăна ĕçченсене шалу тÿлеменшĕн айăпласшăн. Следовательсем палăртнă тăрăх, 2019 çулхи март уйăхĕнчен пуçласа кăçалхи мартчен вăл 10 ĕçченне шалу тÿлемен. Ĕçченсенчен пĕри йĕрке хуралĕнчен пулăшу ыйтнă хыççăн директор шалу парăмне татнă. Уголовлă ĕçе малалла тĕпчеççĕ.

Чемпионат иртĕ

Сентябрĕн 8-10-мĕшĕсенче Шупашкарта çăмăл атлетика енĕпе Раççей чемпионатне иртерме палăртнă. Анчах хальлĕхе çакна çирĕплетсех калама пулмасть. Коронавируспа çыхăннă лару-тăру йĕркеленмесен ăмăртăва каярах хăварĕç. Чăваш Енĕн тĕп хули хăвăрт утас енĕпе наци чемпионачĕпе первенствине те йышăнĕ. Вĕсене сентябрĕн 5-6-мĕшĕсенче ирттерме палăртнă.