ЧĂВАШ автономи облаçне туса хунăранпа 100 çул çитнине халалласа дистанци мелĕпе йĕркеленĕ ача-пăча Акатуйĕнче Пăлапуç Пашьелĕнчи ачасем те пысăк хастарлăх кăтартнă. Культура çурчĕн заведующийĕ Елена Иванова ертсе пынипе вĕсем "Янра, чăваш юрри!" вокал искусствин конкурсĕнче, чăваш халăхĕн культурипе, йăли-йĕркипе, историйĕпе çыхăннă этнокроссвордра пултарулăхпа палăрнă, С. Степанова, Д. Шестаков, А. Бахитова малти вырăнсене йышăннă. Вăл çеç те мар-ха. Çамрăк артистсем онлайн-вăййа та хутшăннă. Çавна май вĕсем авалхи йăла-йĕркене пăхăнса чăваш тумĕсемпе карталанса вăййа тухнă, юрăсем шăрантарнă, ташланă, республика уявĕнче чун-чĕререн савăннă.