ЯЛСЕНЧЕ çĕнĕ йĕркене хăнăхса пыраççĕ, çынсем хуçалăхра пуçтарăнакан кирлĕ мар хытă каяша ятарлă контейнерсене пăрахаççĕ. Анчах та район администрацийĕн строительство, обществăлла инфратытăм аталану пайĕн специалист-эксперчĕ А. Хайбуллова хаçат редакцине пĕлтернĕ тăрăх хăш-пĕр ялта çỹп-çап ещĕкĕ таврашĕнче питĕ йывăр шăршă кĕрет. Кун пирки шăнкăравсем те, çырусем те пулнине пĕлтерчĕ. Çакнашкал тĕслĕхсем уйрăмах Шăнкăртам ялĕнче тĕл пулаççĕ. Сăлтавĕ - çынсем çỹп-çап контейнерне йĕркене пăхăнмасăр выльăх-чĕрлĕхĕн вар-хырăм каяшне (биоотход) пăрахни. Вăл вара хĕвел хĕртсе пăхнă вăхăтра туххăмрах пăсăлма, шăна-пăван пуçтарма пулăшать, таврана ырă мар шăршă сарать. Ăна вара çỹп-çап турттаракансен сортлама, каяшсене контейнертан уйăрса илме тивет. Çавăнпа та кашни çемьен çỹп-çап тăкмалли йĕркепе çыхăннă правилăсене çирĕп пăхăнмалла.