ТАВРАЛĂХА йывăç-тĕм, тĕрлĕрен чечек лартса капăрлатас, çурт-йĕре, хуçалăха тирпейлĕ те капăр тытас, урамсен, ялсен сăн-сăпатне капăрлатас, организаци-предприятисен умĕсене илемлĕ те илĕртỹллĕ тăвас тĕллевпе районта çулсеренех конкурс йĕркелесси йăлана кĕчĕ. Çакнашкал тупăшăва кăçал та ирттерме палăртнă. Çак тĕллевпе йĕркеленĕ комиссие район администрацийĕн пуçлăхĕн çумĕ - строительство тата обществăлла инфратытăм аталану уйрăмĕн начальникĕ Равиль Ямалетдинов ертсе пырать. «Районта чи лайăххи» ята çĕнсе илме çăмăл мар, паллах. Юлашки çулсенче çынсен культура шайĕ, çурт таврашне капăрлатас ăсталăхĕ лайăх енне улшăнса пынăран конкурс çивĕчлĕхĕ те ỹссех пырать. Çапах та район шайĕнче йĕркелекен конкурса çулсеренех 19 ял тăрăхĕнчен пурте хутшăнмаççĕ. Кăçал та сакăр ял администрацийĕ _ Алманчă, Пăлапуç Пашьел, Патăрьел, Нăрваш Шăхаль, Сăкăт, Тутар Сăкăт, Тăрăн, Шăнкăртам çеç - документсем тăратнă. Ыттисенче çак хисепе тивĕçлисем пачах та çук-ши?