ВĂРМАН тусĕсемшĕн çырла тапхăрĕ вĕçленнĕ хыççăн кăмпа сезонĕ пуçланчĕ. Çĕр мăкăртса тухакан çимĕçе пасарта та сутаççĕ-ха. Анчах чылайăшĕ вăрмана кайса кăмпа татма, пĕрлех тавралăхпа, уçă сывлăшпа киленме кăмăллать. Ун пек чухне вăрманти çула лайăх ăнкаракан çынпа çеç каймалла. Унсăрăн çухалса кайма та пулать, тискер чĕрчунсенчен хур курасси те çавăнтах темелле... Республикăра кашни çулах кăмпаçăсем вăрманта çĕтсе кайнă тĕслĕхсем пулаççĕ. Çакнашкал лару-тăрăва çаклансан никамăн та çухалса каймалла мар, çийĕнчех «112» номерпе аварипе çăлав службине шăнкăравламалла. Çавăнпа та çула тухакан кăмпаçăсен кĕсье телефонĕ тулли зарядлă пулни те пĕлтерĕшлĕ.