Малтан шутланă пекех, вунă кун иртсен, пĕтĕмпех сывалса çитнине кура, больницăн эмел шăршиллĕ стенисемпе сывпуллашса, Люба амăшĕпе пĕрле урама, уçă сывлăша тухрĕ. Больница картишĕнче вĕсене Гордеевсем -ашшĕпе ывăлĕ -ăшшăн кĕтсе илчĕç, хăмăр куçĕсем тулли телей çутипе çиçрĕç. Люба валли амăшĕ Алексейпе пĕрле пасарта туяннă хитре кĕпе-тумтир шăпах ăна юрăхлă пулни, вăл хĕр çинче питĕ килĕшỹллĕ курăнни пурне те савăнтарчĕ, хавхалантарчĕ. (Паллах, хальхи модăпа çĕленĕ кĕпе-тумтире капитан хăйĕн укçипе туянчĕ).

Алексей Гордеев, çак паллă кун юриех офицер çи-пуçне тăхăннăскер, хăй чунтан юратакан хĕр патне çар çыннилле çăмăллăн та çирĕппĕн утса пычĕ те ун çине хĕм сапса пăхрĕ.

- Люба, çак çутă тĕнчери чи хаклă çыннăм, манăн мăшăрăм пулсамччĕ, - терĕ ăна кĕлчечексен çыххине панă май.

- Эсĕ мана питĕ килĕшетĕн. - Эпĕ санăн мăшăру пулма хирĕç мар, Алеша, - хуравларĕ хĕр, каччă çине ăшшăн пăхса. - Юрататăп сана, капитан...

- Тĕрĕс утăм тăватăн, хĕрĕм, - Любăна питĕнчен чăпăрт чуп туса илчĕ амăшĕ. - Улми йывăççинчен аякка ỹкмест, теççĕ. Алеша - ашшĕ пекех ăшă кăмăллă çын, талантлă хирург. Капитан саншăн шанчăклă упăшка пуласси пирки эпĕ иккĕленместĕп. - Люба, эпĕ саншăн чăннипех те лайăх упăшка пулăп, сана никампа та улăштармăп, нихăçан та кỹрентермĕп...

- Шанатăп сана, Алеша. Эпĕ те саншăн шанчăклă тата чунтан парăннă арăм пулăп. Маншăн санăн пит хĕрелмелле пулмĕ...

- Алексей, мăшăр пулма эсĕ çакнашкал лайăх хĕре суйласа илнĕшĕн эпĕ çав тери хĕпĕртетĕп, - ывăлне хулпуççирен çемçен çапса илчĕ ашшĕ.

- "Амăшне пăх та хĕрне ил", - теççĕ чăвашсем. - Хаклă аттеçĕм тата хисеплĕ Эльвира Сергеевна, халĕ эпир районти Мăшăрлану керменне кайса хамăра пĕр çемьене пĕрлештерме ыйтса заявлени кайса паратпăр, - терĕ Алексей.

- Эсĕ хирĕç мар-и, Люба?

- Çук, çук,-_ хуравларĕ хĕр, пуçне каччăн çирĕп хулпуççийĕ çине тайăлтарса.

- Кун хыççăн вара, çак паллă куна палăртса, Любăпа иксĕмĕр кăштах ресторанта ларăпăр...