Правительствăри улшăнусем

Чăваш Ен Правительствине çĕнĕрен йĕркелен.. Аса илтеретпĕр, сентябрĕн 22-мĕшĕнче, Олег Николаев Чăваш Ен Пуçлăхĕн должноçне йышăнчĕ. Çавăн хыççăн вăл республикăн Правительствине отставкăна ячĕ. Çавăн пек тума саккун хистет. Халĕ  Олег Николаев чылай министра çĕнĕрен çирĕплетнĕ. Çав вăхăтрах пукансăр юлнисем те пур. Вĕсем иккĕн: вĕрентÿ тата çамрăксен политикин министрĕ пулнă Сергей Яковлев тата культура, национальноçсен ĕçĕсен тата архив ĕçĕн министрĕнче ĕçленĕ Роза Лизакова. Вĕрентÿ министрĕн тивĕçĕсене пурнăçлама Алла Салаевăна, культура министрĕн тивĕçĕсене пурнăçлама Светлана Каликовăна шаннă.

Аграри университечĕпе паллашнă

Чăваш Ен Пуçлăхĕ Олег Николаев Чăваш патшалăх аграри университетĕнче пулнă. Унта вăл республикăри предприятисем пулăшнипе уçăлнă вĕренÿ аудиторийĕсемпе лабораторийĕсен ĕçĕпе паллашнă. Акă, пахча çимĕçпе улма-çырла туса илес ĕçĕн вĕренÿ аудиторине Чăваш Республикин Апат-çимĕç фончĕ пулăшнипе йĕркеленĕ. Фондăн генеральнăй директорĕ Александр Богданов пĕлтернĕ тăрăх, предприяти Чăваш патшалăх аграри университечĕпе тачă çыхăну тытать. Олег Николаев çавăн пекех ÿсен-тăрана хÿтĕлес ĕçĕн аудиторине, инноваци технологийĕсен лабораторине, ятарлă компьютер класне кĕрсе курнă. Унтан «Регионти АПК валли кадрсем хатĕрлес ĕçри хальхи вĕренÿ технологийĕсем: опыт тата аталану малашлăхĕ» ятпа «çавра сĕтел» иртнĕ.

Цифра аталанăвĕн ыйтăвĕсемпе- стратеги сессийĕ

Шупашкарта «Цифра аталанăвĕ. Культура тата туризм. Чăваш Республики» стратеги сессийĕ иртн.? Унăн ĕçне çĕршывăн тĕрлĕ кĕтесĕнчен килнĕ экспертсем, цифра отраслĕнчи специалистсем хутшăннă. Вĕсем культура тата туризм аталанăвне цифра технологийĕсене кĕртессипе çыхăннă ыйтусем тавра калаçнă, тĕрлĕ регионти тĕслĕхсемпе паллаштарнă. Сессие хутшăнакансене Чăваш Республикин цифра аталанăвĕн министрĕ Михаил Анисимов, «Цифра экономики» пĕрлĕхĕн регион политикин директорĕ Александр Зорин саламланă. Сăмах май, ку «Цифра экономики» пĕрлĕх «Раççей Федерацийĕн цифра экономики» наци проекчĕпе килĕшÿллĕн йĕркеленĕ иккĕмĕш мероприяти. Кăшт маларах, август уйăхĕнче IT-отрасль специалисчĕсем Чăваш Енри промышленность предприятийĕсене цифра технологийĕсен çĕнĕлĕхĕсене кĕртессине сÿтсе явнăччĕ. ЧР цифра аталанăвĕн министрĕ Михаил Анисимов пĕлтернĕ тăрăх, çитес вăхăтра тепĕр сесси йĕркелеме палăртнă. Вăл ял хуçалăх сферине пырса тивĕ.

Парăмсем пысăк

Кунсем кĕр енне сулăнчĕç, сивĕсем килесси те инçе мар. Ăшăпа тивĕçтерекен организацисем хĕле мĕнле ирттересси пирки шухăшлаççĕ-ши? Ку ыйту, тĕрĕссипе, шухăшлаттараканни кăна çеç мар, пăшăрхантараканни те, мĕншĕн тесен вĕсен 63,7 проценчĕ «Газпром межрегионгаз Чебоксары» компани умĕнче парăмлă. Газ парса тăнăшăн организацие 1,6 миллиард тенкĕлĕх кивçене кĕнĕ. Уйрăмах, пĕрлĕхĕн генеральнăй директорĕ Кияметдин Мифтахутдинов пресс-конференцире пĕлтернĕ тăрăх, Элĕк, Вăрнар, Красноармейски, Хĕрлĕ Чутай, Сĕнтĕрвăрри, Пăрачкав, Çĕрпÿ, Шупашкар, Çĕмĕрле, Етĕрне районĕсен тата Улатăр, Канаш, Шупашкар, Çĕмĕрле хулисен парăмĕсем пысăк.

Çĕнĕ çын ертсе пырĕ

Сĕнтĕрвăрри районĕн администрацине çĕнĕ çын ертсе пыма тытăннă. Ку должноçе Владимир Мустаев йышăннă. Конкурса Сĕнтĕрвăрри районĕн депутачĕсен Пухăвĕнче пĕтĕмлетнĕ.