Канаш хулипе районĕн аталанăвĕ

Аслă экономика канашĕн эрнекун иртнĕ ларăвĕнче Канаш хулипе районĕн социаллă пурнăçпа экономика аталанăвĕн тĕллевĕсене пăхса тухнă. ЧР Пуçлăхĕ Олег Николаев çак муниципалитетсен малашлăхĕ пысăкки пирки иккĕленмест, хальлĕхе вара татса памалли ыйту чылай. Хулапа районăн экономика аталанăвĕпе, умри тĕллевсемпе вĕсен администрацийĕсен пуçлăхĕсем Виталий Михайловпа Владимир Степанов паллаштарнă. Географи тĕлĕшĕнчен меллĕ вырнаçнă пулин те муниципалитетсенче йывăр ыйтусем чăннипех нумай. Çав шутра — халăхăн вăй питти йышĕ ют регионсене ĕçлеме çÿрени, ĕçсĕрлĕх ÿссе пыни тата ытти те. Ларура районпа хулара пурнăçламалли пайăр инвестици проекчĕсем, республикăн комплекслă программине кĕнĕскерсем, вĕсене тÿрре кăларас енĕпе йышăнмалли мерăсем тавра пайăр калаçу пулнă.

Логотип суйлĕç

2021 çула Чăваш Енре Сăр тата Хусан хÿтĕлев чиккисене чавнă çынсен паттăрлăхне халаллĕç. Çавна май ЧР культура министерстви çулталăкăн логотипне тата брендбукне палăртас тĕллевпе конкурс ирттерет. Ĕçсене декабрĕн 10-мĕшĕччен çак адреспа йышăнаççĕ: Шупашкар хули, Президент бульварĕ, 17-мĕш çурт, 415-мĕш пÿлĕм. Е электрон почтăна ярса памалла: Адрес электронной почты защищен от спам-ботов. Для просмотра адреса в вашем браузере должен быть включен Javascript.. Ыйтса пĕлмелли телефон: 8 (8352) 64-20-80. Конкурс çĕнтерÿçипе килĕшÿ тăвĕç, укçан – 400 пин тенкĕпе _ хавхалантарĕç.

Промышленность туризмĕ аталанĕ

Туризм аталанăвне малашне предприятисем те хăйсен тÿписене хывĕç – республика промышленность туризмне аталантаракан пилотлă регионсен теçеткине лекнĕ. Ку регион имиджне çĕклеме те пулăшĕ, хăнасем предприятисенчи производствăна, унта туса кăларакан продукцие курса хакланă май вĕсемшĕн реклама та пулĕ. Туризмăн çак çул-йĕрне аталантармалли пилот проектне хутшăнмашкăн малтанах Чăваш Енри çичĕ компани кăмăл тунă пулсан халь вĕсен йышĕ теçетке çурăраран та иртнĕ. Вăл татах хутшăнĕ – никамшăн та чару çук.

«Пĕр чÿрече» тытăм

Çĕршывра ял хуçалăх продукцине экспорта ăсатасси ÿссех пырать. Кăçал АПК продукцине 25 млрд тенкĕлĕх сутнă. Ку иртнĕ çулхи çак вăхăтрипе танлаштарсан 16 процент ытларах. РФ Ял хуçалăх министерствинче «Пĕр чÿрече» информаци тытăмне хута кĕртме сĕнеççĕ. Çакă пайтаçăсене тĕнчери рынока тухма пулăшĕ. 2021 çулта цифра платформи урлă экспортерсем ял хуçалăх продукцине, апат-çимĕçне турттарнăшăн субсиди илме пултараççĕ. Малашне АПК продукцийĕшĕн сертификат илнĕшĕн, ют çĕршыв рынокĕнче сарма çăмăллăхпа усă курнăшăн та субсиди илме пултарĕç.

Çитес çул – Вăкăр çулталăкĕ

Йăлана кĕнĕ тăрăх, Шупашкарта Ленин проспектĕнче Çĕнĕ çул паллине вырнаçтараççĕ. Кăçал унта вăкăр пулĕ. Вăл мĕнле пулассине «Уçă хула» порталта сасăлав ирттерсе палăртнă.

Наркокурьера тытса чарнă

Чăваш полицейскийĕсем уйрăмах пысăк виçепе наркотик илсе каякан курьера тытнă. Самар облаçĕнче пурăнакан 43 çулхи арçынна ЧР ШĔМĕн Наркотĕрĕслев управленийĕн сотрудникĕсем «Гром» спецназ боецĕсем пулăшнипе Етĕрне районĕнчи çул-йĕрпе патруль службин постĕнче чарнă. Тĕрĕслев вăхăтĕнче 3 кг синтетика наркотикĕ тупнă. Арçынна тĕрмене 20 çул таран хупма пултараççĕ