Раççей Президенчĕн Владимир Путинăн çулсерен иртекен пресс-конференцийĕ кăçал декабрĕн 17-мĕшĕнче пулать. Кремль пресс-службинче пĕлтернĕ тăрăх, вăл видеоконференци мелĕпе иртет.

Раççейре пурăнакансем декабрĕн 6-мĕшĕнчен тытăнса Владимир Путина ыйтусем пама пуçланă. Ыйтăва ятарласа хатĕрленĕ "Москва - Путину" приложени урлă çитерме май пур.

Приложенире видеошăнкăрав меслетне те пăхса хунă. Маларах хатĕрленĕ видеоыйтăва та (вăл 1 минутран вăрăм пулмалла мар), текст формипе çырса хатĕрленĕ ыйтăва та çак приложени урлă çитерме пулĕ.

Çавăн пекех ыйтăва ятарлă сайтра та пама май пур. Çĕршыв ертỹçин пресс-секретарĕ Дмитрий Песков каланă тăрăх, ăна пресс-конференци умĕнхи кунсенче ĕçлеттерсе ярĕç.

Граждансенчен килнĕ ыйтусене Пĕтĕм Раççейри Халăх фрончĕн волонтерĕсем йышăнса тишкерĕç.

Аккредитациленнĕ журналистсем вара хăйсен ыйтăвĕсене ятарлă площадкăсенчен парĕç. Пресс-конференцие çакăн йышши мелпе усă курса ирттерни коронавирус пандемийĕпе çыхăннă.

А. ИВАНОВ