РАЙОНТА çỹп-çап "реформи" вăя кĕнĕ хыççăн кашни ялтах кил хуçалăхĕнче пуçтарăнакан хытă каяша контейнерсене пуçтарса пырасси йăлана кĕчĕ темелле. Çынсем ятарлă площадкăсене вырнаçтарнă пысăк ещĕксене çỹп-çапа хутаçпа е михĕпе илсе тухса пăрахаççĕ. Йĕрке хулари пекех. Чылай ялта контейнерсем пластмасран, хупписем те çавăн пекех. Патăрьелĕнчи Гагарин урамĕнчи çуртсем таврашне вырнаçтарнисем - тимĕртен. Çаксене куç хывнă та район центрĕнче пурăнакан "кукăр алăсем". Пĕр каçхине вĕсене тытнă та вăрласа кайнă. Халĕ ещĕксенче пуçтарăнакан ăпăр-тапăра йытă-кушак унталла та кунталла сапалать, ача-пăча лапамне те варалать. Çакă çеç тĕлĕнтерет. Яла илем кĕртес, халăх валли хăтлăх туса парас тесе пурнăçлакан ырлăха пăсакансем мĕнле çынсем-ши? Эрех-сăрашăн "бизнес" тăвакансем е чăнласах та ырă тăвакана сăтăр кỹрекенсем? Малашне районти йĕрке хуралĕн сотрудникĕсен обществăлла йĕркене сыхланипе пĕрлех каçсерен контейнер ещĕкĕсене те хураллама тивĕ-ши?