Наци проекчĕсене тỹрре кăларас енĕпе çине тăрса вăй хумаллипе пĕрлех ĕç çинчен каласа кăтартни, тулли информаци пани те пысăк пĕлтерĕшлĕ. ЧР Информполитика министерстви çакна тĕпе хурса хăйне евĕрлĕ мелпе усă курса ятарлă портал хатĕрленĕ.

Чăваш Енĕн ИТ-кластерне явăçтарнă та - çак ассоциаци Раççейĕн тĕрлĕ кĕтесĕнчи 25 командăна хутшăнтарса онлайн-хакатон (программистсен ăмăртăвне) йĕркеленĕ. Çынсем пухăнаççĕ те талăкĕпех ниçта пăрăнмасăр пĕр-пĕр проект хатĕрлеççĕ. Çапла майпа командăсем тупăшса ĕçленĕ - наци проекчĕсем тĕлĕшпе Раççейре кунашкал ĕç халиччен пулман-мĕн. Тупăшу çимĕçĕ - шăпах çак портал.

Мĕнешкел пысăк ĕç пурнăçлама тивни куçкĕретех. Нацпроектсемпе ĕçленине Мускав икçĕре яхăн кăтартупа хаклать. Тĕрĕслев кăтартăвĕсен пĕтĕмĕшле шучĕ вара 1 пинрен те иртет. Кăтартусене пурне те систематизацилесе портала кĕртесси çăмăлах марри каламасăрах паллă. Çийĕнчен цифра купи кăна кирлĕ мар вĕт - специалистсемшĕн çеç мар, ахаль çынсемшĕн те уçăмлă, ăнланмалла тата кăсăклă информаци пулмалла.

Портала тăватă блока уйăрнă: нацпроектсемпе çыхăннă информаци, нацпроектсен паспорчĕсенче сăнланнă нормăпа право докуменчĕсем, нацпроектсен интерактивлă карттисем тата нацпроектсемпе çыхăннă хыпарсемпе паллаштаракан пресс-центр - мĕн интереслентернине кура кирлине тупма, паллашма меллĕ. Тĕслĕхрен, строительство объекчĕсен интерактивлă карттине уçатăн та - ăçта мĕн туни е тăвасси тỹрех куç умне тухать.

Пĕр сăмахпа каласан, кашни наци проекчĕ тĕлĕшпе уçăмлă информаци пур: мĕнле объектсем хута кайни, халь мĕнле проектсемпе ĕçлени тата çитес вăхăтра хăш енĕпе ĕçлесси таранах - пĕтĕмпех пĕр çĕрте.

Республикăн наци проекчĕ- сен порталне кĕрес тесен np.cap.ru ссылкăпа кĕрĕр те - тỹрех тупатăр. Çав шутра, паллах, Патăрьел районĕнче наци проекчĕсемпе килĕшỹл-лĕн пурнăçлакан ĕçсемпе те паллашма пулать. Район администрацийĕн сайтĕнче те çак тĕллевпе ятарлă баннер уçнă.

А. ИВАНОВ