Раççей Федерацийĕн Пенси фончĕн республикăри уйрăмĕн Патăрьел районĕнчи (Шăмăршă тата Елчĕк районĕсемпе пĕрле) управленийĕ 23999 çынна пенсипе тивĕçтерсе тăрать. Вĕсен вăтам пенсийĕ 12869,54 тенкĕпе танлашать. Çакă пурăнмалли виçерен 1,62 хут пысăкрах. 2596 çын вара пенсие тухнă хыççăн та ĕçлет

. Октябрĕн 1-мĕшĕ тĕлне учетра 2585 страхователь тăрать. Вăл шутран 822-шĕ - ĕçпе тивĕçтерекеннисем, 17633-шĕ - индивидуаллă предпринимательсемпе фермер хуçалăхĕсен ертỹçисем.

Ачаллă çемьесене патшалăх пулăшăвĕ памалли программа ăнăçлă пурнăçланса пырать. 2007 çулхи январĕн 1-мĕшĕнченпе ача амăшĕн капиталĕпе тивĕçтереççĕ. Çавăнтанпа унăн сертификатне 5650 ытла çемьене панă. Кăçалхи январĕн 1-мĕшĕнче çуралнă пĕрремĕш ачашăн та ача амăшĕн капиталне параççĕ. Вăл 466617 тенкĕпе танлашать. Иккĕмĕш ача çуратнисем вара ун çумне тата хушма 150 пин тенке тивĕçеççĕ. 2020 çулхи апрелĕн 15-мĕшĕнчен ача амăшĕн капиталĕн патшалăх тивĕçтерĕвĕн сертификатне илес текенсен заявлени те çырмалла мар. Ку енĕпе пирĕн районта 203 çемье усă курнă.

Ача амăшĕн капиталне пурăнмалли çурт-йĕре лайăхлатма (кредита саплаштарма), çитĕнекен ăрăва вĕрентнĕ çĕре, амăшĕн пухăнса пыракан пулас пенсийĕ валли яма, сусăр ачасем валли таварсем туянма е тивĕçтерỹсемшĕн тỹлеме усă курма юрать. Патшалăх пулăшăвĕпе ытларахăшĕ туллин усă курчĕç те ĕнтĕ.

2018 çулта ача амăшĕн капиталне уйăхсерен паракан тỹлев çумне хушса усă курмалли йĕрке те тухрĕ.

Раççей Федерацийĕн Президенчĕн хушăвĕпе килĕшỹллĕн 3 çул тултарман ачасене апрель-июнь уйăхĕсенче пилĕкшер пин тенкĕ памалла турĕç. Çакăнпа 1851 çемье усă курчĕ.

Раççей Федерацийĕн Пенси фончĕн республикăри уйрăмĕн Патăрьел районĕнчи управленийĕн коллективĕ кирек хăш тивĕçтерĕве те вăхăтра тата туллин пурнăçласа пыма тăрăшать. Ĕç ăнăçлăхне кадрсем татса параççĕ. Çавна май управлени ĕçченĕсене, ветерансене Пенси фондне йĕркеленĕ кунпа, 30 çулхи юбилейпе ăшшăн саламлатăп, ĕçре ăнăçу, çемьере килĕшỹ, çирĕп сывлăх, тулли телей сунатăп.

Г. СИНЕЕВА, Пенси фончĕн районти управленийĕн начальникĕ